काठमाडौं- पाकिस्तानी सुरक्षा बलले आफ्ना दुई जना छोरालाई बेपत्ता पारेको भन्दै बलोचिस्तानकी महिलाले उनीहरुलाई तत्काल रिहा गरिदिन आग्रह गरेकी छिन् । बलोचिस्तानको राजधानी क्वेट्टामा बसोबास गर्ने ती महिलाले रातिको समयमा सुरक्षाकर्मीले आफ्नो घरमा छापा मारी दुई छोरालाई बेपत्ता पारेको जनाएकी हुन् ।

बलोचिस्तान पोस्टका अनुुसार बीबी शाहिदाले आफ्ना छोराहरु १७ वर्षीय तनवीर अहमद र १५ वर्षका बशीर अहमदलाई बेपत्ता पारिएको बताएकी हुन् । उनीहरुलाई हिरासतमा लिएको जानकारी दिइएपनि उनीहरुको अवस्था अज्ञात रहेको उनको भनाइ छ ।

उनका अनुसार क्वेट्टाको शरिब भन्सार क्षेत्रस्थित किली बङ्गुलजाईमा रहेको आफ्नो घरमा सुरक्षाकर्मीले राति एक बजे छापा मारेका थिए । सोही क्रममा उनका दुई छोरालाई नियन्त्रणमा लिइएको थियो ।

सुरक्षाकर्मीले उनलाई सोधपुछका लागि नियन्त्रणमा लिएकाले चाँडै छोराहरुलाई छाडिदिने आश्वासन दिएका थिए । यद्यपि लामो समय बितिसक्दा पनि उनीहरुको अवस्था अज्ञात रहेको उनको भनाइ छ ।