कोलम्बो – आइसीसी टी–२० विश्व कपको ३५औँ खेलमा पाकिस्तानले नामीबियालाई पराजित गरेको छ । बुधबार कोलम्बोस्थित सिंहलिज स्पोर्ट्स क्लबमा सम्पन्न खेलमा पाकिस्तानले नामीबियालाई १०२ रनको फराकिलो अन्तरले पराजित गरेको हो ।

पाकिस्तानले दिएको २०० रनको लक्ष्य पछ्याएको नामीबिया १७.३ ओभरमा अलआउट हुनुअघि मात्रै ९७ रन बनायो । उसका लागि लोरेन स्टीनक्याम्पले २३ र अलेक्जेन्डर बुसिङभोल्सेन्क २० रन बनाउनु बाहेक अन्यले दोहोरो अंकमा रन बनाउन सकेनन् ।

पाकिस्तानका लागि उस्मान तारिकले चार विकेट लिए । ३.३ ओभर बलिङ गरेका तारिकले १६ रन खर्चिए । यस्तै शादब खानले तीन र सलमान मिज्राले एक विकेट लिए ।

त्यसअघि टस जितेर पाकिस्तानले ब्याटिङ रोज्दै २० ओभरमा ३ विकेट गुमाएर १९९ रन बनाएको थियो । पाकिस्तानी ओपनर साहिबजादा फरहानले ५८ बलमा नटआउट १०० रनको पारी खेलेर शतक पूरा गरे।

शादाब खानले नटआउट ३६ रन बनाए । कप्तान सलमान अली आगाले ३८ रनमा पारी समाप्त गरे। नामीबियाका लागि ज्याक ब्रेसलले २ विकेट लिए । जेरार्ड इरास्मसको नाममा १ विकेट रह्यो । जितसँगै पाकिस्तान सुपर आठमा प्रवेश गरेको छ ।