काठमाडौं– प्रतिनिधिसभाको निर्वाचन लक्षित कांग्रेसले सार्वजनिक गरेको भिजनमा अवैध तरिकाले सम्पत्ति थुपार्नेलाई नियन्त्रण गरिने उल्लेख गरिएको छ ।

बुधबार जनकपुरको एक सभाको बीचबाट सार्वजनिक गरिएको भिजनमा कांग्रेसले पारदर्शी र वैध नाफा आर्जनलाई प्रोत्साहन गर्ने उल्लेख छ ।

‘राज्यले पारदर्शी र वैध नाफा आर्जनलाई प्रोत्साहित गर्नेछ, तर अवैध तरिकाले सम्पत्ति थुपार्ने र उपभोग गर्ने प्रवृत्तिलाई निर्ममतापूर्वक नियन्त्रण गर्नेछ, आर्थिक स्वच्छता र सदाचारलाई संस्कृतिकै रूपमा अघि बढाउने काम राजनीतिक नेतृत्वले गर्नेछ’, कांग्रेसको भिजनमा उल्लेख छ ।

आँट गरेर लगानी गर्ने, रोजगारी र सम्पत्ति सृजना गर्ने एवं उत्पादनमा जोडिने सबैलाई काँध थाप्ने राज्य बनाउने कांग्रेसको भिजनमार्फत आफ्नो नीति सार्वजनिक गरेको छ । 

‘सानादेखि ठूलासम्मका व्यवसाय गर्ने नागरिकलाई राज्यले हरतरहले प्रोत्साहन र साथ दिनेछ’, भिजनमा उल्लेख छ, ‘साथै, आर्थिक रूपमा पछाडि परेका नागरिकलाई पनि सम्पत्ति र आय आर्जन गर्न सक्ने गरी सक्षम बनाउनेछ ।’