काठमाडौं– नेपाली कांग्रेसले सार्वजनिक गरेको प्रतिज्ञा पत्रमा छोराछोरी पढाउन आर्थिक भार नपर्ने नेपाल गराउने घोषणा गरेको छ ।

 बुधबार जनकपुरधाममा प्रतिज्ञा सभा गर्दै सार्वजनिक गरिएको १० बुँदे  भिजनसहितको प्रतिज्ञापत्रमा उक्त विषय उल्लेख गरिएको हो । 

‘आर्थिक अभावका कारण कोही पनि गुणस्तरीय शिक्षा पाउने अधिकारबाट वञ्चित हुने छैन । शारीरिक पोषण पूरा भएका नानीबाबुहरूमा सिकाइको क्षमता बढ्छ, त्यसैले राज्यले शिक्षासँगै जोडेर पोषणको पनि जिम्मा लिनेछ,’ प्रतिज्ञापत्रमा उल्लेख छ ।

सबै किसिमका हिंसा र शोषणबाट मुक्त हाम्रा नानीबाबुले विद्यालय र खेलमैदानमा रमाउँदै बाल्यकाल बिताउन पाउने छन् । 
शिक्षालयलाई विद्यार्थीको सृजनशीलता र नवप्रवर्तनको उच्चतम प्रयोग र प्रोत्साहन हुने केन्द्र बनाउने उल्लेख छ । 

‘प्रि–प्राइमरीदेखि विश्वविद्यालयसम्मलाई प्रविधिसँग जोड्नेछौँ, जीवनोपयोगी ज्ञान, विवेकपूर्ण चेतना र मूल्यमा आधारित शिक्षा प्रणालीले हाम्रा युवालाई विश्वभर प्रतिस्पर्धा गर्न सक्ने बनाउनेछ,’ प्रतिज्ञापत्रमा उल्लेख छ ।