काठमाडौं– नेपाली कांग्रेसले प्रतिनिधिसभाको निर्वाचन लक्षित भिजन सार्वजनिक गर्दै छोराछोरी पढाउन आर्थिक भार नपर्ने नेपाल बनाउने पार्टीको नीति रहने बताएको छ । बुधबार जनकपुरमा आयोजित सभामा सार्वजनिक गरिएको कांग्रेसको भिजनमा सो कुरा उल्लेख गरिएको हो ।

‘हाम्रो परिकल्पनाको नेपालले शिक्षालाई खर्च होइन, राष्ट्रको सबैभन्दा महत्त्वपूर्ण लगानी मान्दछ । शिक्षाको सर्वसुलभता र पूर्वाधारमा आधारभूत परिवर्तन हुनेछ । आर्थिक अभावका कारण कोही पनि गुणस्तरीय शिक्षा पाउने अधिकारबाट वञ्चित हुने छैन’, कांग्रेसको भिजनमा उल्लेख छ ।

साथै, कांग्रेसको भिजनमा शिक्षासँगै बालबालिकाको पोषणको जिम्मा पनि राज्यले लिने नीति अगाडि सारिएको छ ।

‘शारीरिक पोषण पूरा भएका नानीबाबुहरूमा सिकाइको क्षमता बढ्छ, त्यसैले राज्यले शिक्षासँगै जोडेर पोषणको पनि जिम्मा लिनेछ’, भिजनमा उल्लेख छ ।

प्रि–प्राइमरीदेखि विश्वविद्यालयसम्मको सिकाइलाई प्रविधि र प्रयोगसँग जोड्ने शिक्षालयहरू विद्यार्थीको सृजनशीलता र नवप्रवर्तनको उच्चतम प्रयोग र प्रोत्साहन हुने केन्द्र हुने कांग्रेसको भिजनमा उल्लेख छ ।