काठमाडौं – फागुन १ बाट प्रदर्शनमा आएका तीन फिल्महरु ‘श्री बुकुरो’, ‘बिगुल’ र ‘शिवांश’को प्रदर्शन स्थगित गरिएको छ ।

तीन फिल्मका टिमले नै फागुन ६ गतेबाट प्रदर्शन स्थगित गर्ने निर्णय लिएका हुन् ।

‘शिवांश’ले प्रदर्शन स्थागनको कारण फरक देखाएको छ । ‘बिगुल’ र ‘श्री बुकुरो’ले फागुन २१ को चुनाव देखाएका छन् ।

‘शिवांश’ टिमले प्रदर्शन रोक्नुको दुई कारण देखाएको छ । पहिलो, प्रतिकुल शो पाएको । दोस्रो, प्रचारमा कमजोरी ।

निर्माता अन्जन केसीले जारी गरेको विज्ञिप्तिमा लेखिएको छ, ‘विषयवस्तु र मेकिङ राम्रो भए पनि प्रमोसनमा चुेकेको शिवांश टिमले महसुस गरेको छ ।’

‘श्री बुकुरो’ले आगामी वैशाख १८ लाई नयाँ प्रदर्शन मिति तोकेको छ । अन्य दुईले नयाँ प्रदर्शन मिति तोकेका छैनन् ।

यी तीनै फिल्मले प्रदर्शन स्थगितको कारण जे किटान गरे पनि वास्तविकता एकै छ । कमजोर अकुपेन्सीको लाज ढाक्न निर्माण टिमले प्रदर्शन रोकेको हो ।

पछिल्लो समय फिल्मको व्यापार एक करोड कट्न पनि मुस्किल छ । फेरि, दर्शक हलमै नआएका भने होइनन् । ‘परान’ र ‘आबाट आमा’ जस्ता फिल्मले दर्शकबाट साथ पाएका छन् ।

पछिल्लो समय चुनावी महोलले दर्शक फिल्म हेर्ने मुडमा छैनन् भन्ने तर्क पनि सुनिन्छ । तर, यही सन्दर्भमा ‘आबाट आमा’ हिट साबित भएको छ ।

प्रदर्शन रोकिएका तीनै फिल्मको व्यापार कमजोर छ । यिनीहरुको ग्रस कलेक्सन लाखमै सीमित छ । सुरुवाती ६ दिनको अकुपेन्सी एकदमै कमजोर छ ।

यही कमजोर व्यापारको लाज ढाक्न मेकरहरुले फिल्म हलबाट निकालेका हुन् । अर्थात्, फिल्मले दर्शकलाई हलमा तान्न नसकेपछि उनीहरुले सेफ ल्यान्डिङ गर्न स्थगितको जुक्ति तिर लागेका हुन् ।