जनकपुरधाम‍‍- राष्ट्रिय स्वतन्त्र पार्टी रास्वपा मधेस प्रदेशकी संस्थापक सभापति ममता शर्मा नेपाली कांग्रेसमा प्रवेश गरेकी छन् ।

जनकपुरधामको तिरुहुतियागाछीमा बुधबार आयोजित कांग्रेसको प्रतिज्ञा सभामा उनलाई पार्टी केन्द्रीय सभापति गगनकुमार थापाले स्वागत गरे ।

पार्टी प्रवेश गरेसँगै उनले रास्वपामा दागैदाग भएकाहरूको बिगबिगी रहेकाले रास्वपा छाडेको बताइन् । उनले प्रतिज्ञा सभामा भनिन्, ‘रास्वपा पार्टीमा दागैदाग भएकाले टिकट पाएपछि मैले गरेको योगदान खेर गयो । उक्त पार्टी परित्याग गरी जेन-जीको भावना बोक्ने र सुशासनको काममा जोड दिने कांग्रेसमा प्रवेश गरेकी हुँ।’

उनले कांग्रेस ८० वर्षको विरासत बोकेको मात्रै नभई मधेसको आवाजलाई पहिलो प्राथमिकतामा राखेर वर्तमान सभापतिले नै उम्मेदवारी दिएकाले सबैले मधेशी जनताले साथ दिनुपर्ने बताइन् ।

उनले हरेक पटकको चुनावमा मधेशले नेताहरूलाई भोट दिए पनि नेताहरूले मधेसलाई चोटैचोट दिएको हुनाले यसपटक बदलिएको कांग्रेसलाई भोट दिन पनि अपील गरिन् ।

मैथिली भाषामा बोल्दै उनले भनिन्, ‘सब दाइब मधेससक जनतासब भोट नेतासबके देने है। मगर सब दिनसे नेतासब मधेसक जनताके लुइट रहल है। यहाँ सब यी दाइब मधेसमे निक उम्मेदवार छानू,कांग्रेसके उम्मेदवारके पहचानू ।’

शर्माले अहिले गगन नेतृत्वको कांग्रस नयाँ रास्वपा भएको बताइन् । वैकल्पिक भनिएको रास्वपा भने पुरानो कांग्रेसको शैलीमा गएको उनले टिप्पणी गरिन् ।

भनिन्, ‘अहिले कांग्रेस गगन दाइको नेतृत्वमा बदलिएर नयाँ रास्वपा जस्तो बनेको छ। तर आफूलाई वैकल्पिक भनिएका रास्वपाका नेताहरू दागैदाग भएका,आर्थिक चलखेलमा मुछिएका, मुद्दैमुद्दामा लागेका छन्। सब पुराना कांग्रेस जस्ता छन् ।’

उनले अब आफैं मधेसको नारीले सच र देशलाई अगाडि बढाउने पार्टीमा लागेको भन्दै सबैले कांग्रेस उम्मेदवारहरूलाई भोट दिन अपील गरिन् ।

उनले मधेसबाट खाडीमा हरेक घरबाट एकजना पुरुष वैदेशिक रोजगारीमा गएकाले यहाँ महिला नै भोटमा निर्णायक भूमिका रहेको बताइन् । उनले महिलाको सम्मान, त्याग र बलिदानलाई बुझ्‍‍ने पार्टी कांग्रेस भएकाले यस पटककको मत सोचेर गाछीमै हाल्न अनुरोध गरिन् ।