काठमाडौं– नेपाली कांग्रेस केन्द्रीय कार्यसमितिले प्रतिनिधि सभा सदस्य निर्वाचनका लागि तयार पारिएको पार्टीको प्रतिज्ञा पत्र सर्वसम्मत रूपमा पारित गरेको छ। भर्चुअल माध्यमबाट बसेको केन्द्रीय कार्यसमितिको बैठकले फागुन २१ गते हुने निर्वाचनलाई लक्षित गर्दै प्रतिज्ञा पत्र अनुमोदन गरेको हो।

पार्टीले उक्त प्रतिज्ञा पत्र आज जनकपुरधाममा आयोजना हुने विशेष सभामार्फत सार्वजनिक गर्ने कार्यक्रम तय गरेको छ। प्रतिज्ञा सभामा पार्टीका सभापति गगनकुमार थापा, उपसभापति विश्वप्रकाश शर्मालगायत केन्द्रीय तहका प्रमुख नेताहरूले सम्बोधन गर्ने जनाइएको छ।

कांग्रेसले मधेसको ऐतिहासिक तथा सांस्कृतिक महत्व बोकेको जनकपुरधामबाट प्रतिज्ञा पत्र सार्वजनिक गर्नुलाई राजनीतिक रूपमा अर्थपूर्ण कदमका रूपमा लिएको छ। पार्टीका नेताहरूका अनुसार यो सभा केवल चुनावी कार्यक्रम मात्र नभई मधेसको स्वाभिमान, समावेशी लोकतन्त्र र राष्ट्रिय एकताको सन्देश दिने अवसरसमेत हो।

मधेस प्रदेश सभापति कृष्णप्रसाद यादवका अनुसार मधेस आन्दोलनपछि विकसित राजनीतिक परिवेशमा कांग्रेसले मधेसका जनताको पहिचान, अधिकार, समानुपातिक समावेशिता र सशक्तीकरणका मुद्दालाई प्राथमिकतामा राख्दै आएको छ। उनले मधेसको माटोले सधैं प्रजातन्त्र र सङ्घीय लोकतान्त्रिक गणतन्त्रको पक्षमा दृढ आवाज उठाउँदै आएको उल्लेख गरे।