काठमाडौं- पाकिस्तानी प्रहरीले अफगान शरणार्थीलाई पक्राउ गर्ने अभियान तीव्र बनाएको छ । मुख्यगरी राजधानी इस्लामावाद शहरमा धमाधम अफगान शरणार्थी पक्राउ पर्ने क्रम चलिरहेको छ ।

उनीहरुलाई पक्राउ गरी अस्थायी शिविरमा लैजाने गरिएको खामा प्रेसले जनाएको छ । यसरी पक्राउ परेका अफगान शरणार्थीमध्ये एक जना अफगान पत्रकार पनि रहेका छन् ।

उनीहरुलाई अफगानिस्तान पठाइनेछ । समाचारमा जनाइए अनुसार इस्लामावादको बी १७ क्षेत्रबाट पक्राउ परेका शणार्थीलाई हाजी शिविर लगिएको छ ।

अधिकारकर्मीहरुले प्रहरीको यस्तो गतिविधिले शरणार्थीका परिवारमा दबाब र मानसिक चिन्ता पैदा गरेको छ । वर्षौँदेखि कुनै कानुनी संरक्षणबिना पाकिस्तानमा बसोबास गरिरहेका अफगान शरणार्थी पाकिस्तानी प्रहरीको निशानामा परेका छन् ।

पाकिस्तानले दशकौँदेखि दशौँ लाख अफगान शरणार्थीलाई शरण दिँदै आएको छ । यद्यपि पछिल्ला केही वर्षयता पाकिस्तान सरकारले अफगान शरणार्थीलाई पक्राउ गरी देश निकाला गर्ने क्रमलाई तीव्र पारेको छ ।