सुनसरी- धरान उपमहानगरपालिकाका मेयर हर्कराज राई (हर्क सम्पाङ)ले आइतबार साँझ पदबाट राजीनामा दिएका छन्। उनी श्रम संस्कृति पार्टीका केन्द्रीय अध्यक्ष हुन्। यो पार्टीले पछिल्लो समय कोशी प्रदेशमा पकड बनाइरहेको छ।

२०७९ को चुनावमा लौरो लिएर मेयर जितेका साम्पाङले सुनसरी क्षेत्र नम्बर १ बाट प्रतिनिधि सभाको चुनाव लड्न राजीनामा दिएका हुन्।

उनले धरानमा माओवादी केन्द्रबाट विजयी उपमेयर अइन्द्रबिक्रम बेघालाई राजीनामा पत्र बुझाएका हुन्।

यसअघि काठमाडौं महानगरपालिकाका मेयर बालेन्द्र साहले पनि संसदीय चुनाव लड्न राजीनामा दिएका छन्।

उनले राजीनामासँगै रास्वपा वरिष्ठ नेताका रुपमा काम पनि थालेका छन् । बालेन्द्रले झापा ५ मा एमाले अध्यक्ष केपी शर्मा ओलीसँग लड्ने बताइरहेका छन् ।

तर उनले काठमाडौं क्षेत्र नम्बर २ पनि होल्डमा राखेका छन् । काठमाडौं २ मा २०७९ सालमा विजयी सोबिता गौतमलाई चितवन ३ पठाएर उक्त क्षेत्र होल्डमा राखिएको छ।

बालेन्द्र राजीनामा दिएर आइतबार नै जनकपुर पुगिसकेका छन् । त्यहाँ रास्वपा सभापति रवि लामिछाने र उनले पार्टीको चुनावी अभियान थाल्दैछन् । बालेनलाई रविले पकड कमजोर भएको मधेशमा ‘मधेश पुत्र’ का नाममा भोट तान्ने माध्यम बनाउन खोजिरहेका छन्।