काठमाडौं- नेपाली कांग्रेसका वरिष्ठ नेता डा. शेखर कोइरालाले आफू मध्यमार्गी भएकाले पार्टीभित्र दबाब झेलिरहेको बताएका छन् ।

काठमाडौंमा आइतबार आयोजित आफू पक्षीय नेताहरूको भेलालाई सम्बोधनका क्रममा उनले यस्तो बताएका हुन् ।

‘मध्यमार्ग र सत्यको बाटो गारो र अप्ठ्यारो हुन्छ तर जीत उसैको हुन्छ । म सत्यको बाटो हिँडिरहेको छु । यसबाट विचलित हुन्न’, उनले आफूनिकट नेताहरूलाई ढाडस दिँदै भने ।

कोइरालाले पार्टीलाई अतिवादले गाँजेको भन्दै आफू कुनै पनि अतिवादको घेरामा नपरी मध्यममार्गी बाटोबाट विचलित नहुने दृढता पनि जनाए ।

पार्टीको कठिन अवस्थामा डा. कोइरालाले मध्यमार्गी भूमिका निर्वाह गरी पार्टीलाई संकटबाट जोगाउनु पर्नेमा जोड दिएका थिए ।

बत्तिसपुतलीको अनुपम फुडल्यान्डमा भएको उक्त छलफलमा बोल्ने नेताहरूले पार्टीको १५औँ महाधिवेशन अन्योलमा परेकोमा चिन्ता जाहेर गरे । उनीहरूले त्यसको सुनिश्चितता गरिनुपर्नेमा पर्नेमा जोड दिएका छन् ।

यसका साथै तोकिएको मिति फागुन २१ गते मा निर्वाचन हुनेमा ढुक्क हुने अवस्था बनिनसकेको पनि बताएका थिए ।

कार्यकर्ता भेलालाई सम्बोधन गर्दै कोइरालाले यही फागुन २१ गते हुने निर्वाचनमा सहभागी हुनेसमेत बताएका छन् ।

कोइरालाले देश र लोकतन्त्र संकटमा रहेकाले निर्वाचनमा जानुको विकल्प नरहेको जानकारी दिए । उनले नेता कार्यकर्तालाई पनि निर्वाचनमा सहभागी हुन आह्वान गरे ।

डा. कोइरालाले भने, ‘निर्वाचन सहजता लागि माघ ६ गतेको मनोनयन मिति सार्न निर्वाचन आयोगलाई अनुरोध गरेको थिएएँ । सरकारले निर्वाचनको वातावरण बनाएर सुरक्षाको ग्यारेन्टी गर्नुपर्नेमा त्यसको प्रत्याभूति हुन सकेको छैन ।’

पार्टीमा देखिएको विवादको विषय अदालत प्रवेश गरिसकेकोले आफूलाई न्यायाधीशहरूको निर्णय मान्य हुनेसमेत कोइरालाले बताए ।

नेता-कार्यकर्तालाई निर्वाचनसँगै १५औं महाधिवेशन को तयारी गर्न र त्यसमा लाग्न पनि उनले निर्देशन दिए ।

उक्त कार्यक्रममा सुझाव दिने क्रममा जिल्लाका नेता तथा कार्यकर्ताहरूले निर्वाचन आयोगले अन्याय गरे पनि अदालतले न्याय गर्नेमा विश्वास रहेको बताएका छन् ।