काठमाडौं- नेकपा एमालेका अध्यक्ष केपी शर्मा ओलीले मनोमानीपूर्वक चयन गरिएको उम्मेदवारीलाई लिएर चर्को आलोचना भएपछि सच्याउन थालेका छन् ।

उनले सुदूरपश्चिमका दुईवटा निर्वाचन क्षेत्रका लागि उम्मेदवारको नाम सच्याएएका हुन् । शनिबारको सचिवालय बैठकमा ओलीले एकलौटी गरेको निर्णयमा कार्यकर्ताहरूले आपत्ति र विरोध जनाएपछि उम्मेदवार फेरिएको हो ।

एमालेले कञ्चनपुर क्षेत्र नम्बर १ को निर्वाचनमा २०७९ सालमा विजयी तारा लामा तामाङलाई नै टिकट दिने भएको छ । यसअघि शनिबार केन्द्रीय सदस्य कमला बोहरालाई उम्मेदवार बनाउने निर्णय भएको थियो ।

तर बोहोराको उम्मेदवारीलाई लिएर स्थानीय एमालेबृत्तमा चर्को आलोचना भएको थियो । त्यसपछि आफ्नो गुटबाहिरका भए पनि ओलीले निवर्तमान प्रतिनिधिसभा सदस्य तामाङलाई नै टिकट दिन लागेका हुन् ।

यस क्षेत्रबाट यस पटक पनि पुष्पकमल दाहाल प्रचण्डकी बुहारी बीना मगरले नेपाली कम्युनिष्ट पार्टी (नेकपा) बाट प्रतिस्पर्धा गर्दैछिन् । २०७९ मा बीनालाई ताराले नै हराएका थिए ।

एमालेले बझाङमा पनि युवा नेता ऐन महरलाई उम्मेदवार बनाउने भएको छ । अफिलाल ओखेडालाई उम्मेदवार बनाउने निर्णय सच्याउँदै एमालेले महरलाई उम्मेदवार बनाउने भएको हो । तर त्यहाँ एक मात्रै दलित उम्मेदवार ओखेडाले निराश हुनुपरेको छ।

महर २०७९ को चुनावमा नेकपा एकीकृत समाजवादीका भानुभक्त जोशीसँग थोरै मतान्तरले पराजित हुन पुगेका थिए ।