काठमाडौं– गैर न्यायिक रुपमा खोला तथा सडक मापदण्ड निर्धारण गरिएको भन्दै विरोध स्वरूप आइतबार पनि काठमाडौंमा विरोध प्रदर्शन गरिएको छ ।  

खोला मापदण्डविरुद्ध भूमि अधिकार संरक्षण समिति लगायत विभिन्न करिडोर मापदण्ड पीडित संघर्ष समितिहरूले संयुक्त रुपमा काठमाडौको माइतीघरमा विरोध प्रदर्शन गरेका हुन् ।

सडक तथा खोला मापदण्डका नाममा ८४ हजार भन्दा बढी घरधुरीको उठीबास लाग्ने अवस्था आएकोले विरोध प्रदर्शन गर्नुपरेको समितिले जनाएको छ । 

२०८० साल पुस ३ गते सर्वोच्च अदालतले २० मिटर मापदण्ड तोकेर ४० मिटर दाँयाबाँया कायम गर्न आदेश दिएको थियो । सरकारको निर्णय र सर्वोच्चको आदेशका कारण आफूहरू थप मर्कामा परेकाले प्रदर्शन गर्नुपरेको धोविखोला करिडोर प्रभावित समितिका संयोजक ऋषिराम बस्यालले बताए ।  

संघर्ष समितिहरूले सर्वोच्चले आफूहरूलाई न्याय दिने र २०६५ मंसिर १ गते सरकारले समेत जारी गरेको खोला मापदण्ड समेत खारेज हुने जनाएका छन् ।