हेटौँडा – हेटौँडाबाट काठमाडौँ जोड्ने त्रिभुवन राजपथ (बाइरोड) र कान्ति राजमार्गमा शुक्रबारदेखि दुईतर्फी रूपमा यातायात सञ्चालनमा आएका छन्।

पृथ्वी राजमार्गअन्तर्गत धादिङको कृष्णभीर खण्डमा अबरुद्ध बनेको सडक सञ्चालनमा आएसँगै दुवै मार्गमा लगाइएको एकतर्फी आवागमनको नियम हटाइएको जिल्ला प्रशासन कार्यालय मकवानपुरका प्रशासकीय अधिकृत सन्तोष सुवेदीले जानकारी दिए।

यसअघि कृष्णभीरमा सडक अवरुद्ध भएपछि सवारी चाप र जोखिम व्यवस्थापन गर्न गत भदौ १६ गतेदेखि मालवाहक तथा ठूला यात्रुवाहक सवारी साधनलाई जाँदा त्रिभुवन राजपथ र फर्कँदा कान्ति राजमार्ग प्रयोग गर्ने गरी एकतर्फी व्यवस्था मिलाइएको थियो।

मुख्य राजमार्ग खुला भएसँगै उक्त अल्पकालीन व्यवस्था अन्त्य गरी त्रिभुवन राजपथ र कान्ति राजमार्ग दुवैमा पहिलेझैँ नियमित रूपमा दुवैतर्फबाट सवारी साधन सञ्चालन गर्न दिइएको प्रशासनले जनाएको छ।