काठमाडौं– भारतीय स्थल सेना प्रमुख जनरल धिरज सेठ प्रधानमन्त्री बालेन्द्र शाहलाई भेट्न सिंहदरबारस्थित प्रधानमन्त्री तथा मन्त्रिपरिषद्को कार्यालय पुगेका छन् ।

जनरल सेठ दिउँसो २:४० बजे प्रधानमन्त्री कार्यालय पुगेका हुन् । उनको आगमनअघि नेपाली सेनाका प्रधानसेनापति पनि प्रधानमन्त्री कार्यालय पुगेका थिए।

भारतीय स्थल सेना प्रमुख सेठ चारदिने नेपाल भ्रमणका क्रममा आइतबार काठमाडौं आएका हुन् । सोमबार उनलाई राष्ट्रपति रामचन्द्र पौडेलले नेपाली सेनाको मानार्थ प्रधानसेनापतिको दर्ज्यानी चिह्न प्रदान गरेका थिए ।

राष्ट्रपति भवन शीतल निवासमा आयोजित विशेष समारोहमा राष्ट्रपति पौडेलले उक्त सम्मान प्रदान गरेका थिए ।

नेपाल र भारतबीच सन् १९५० देखि एक–अर्को देशका सेना प्रमुखलाई मानार्थ महारथीको दर्जा प्रदान गर्ने ऐतिहासिक परम्परा छ । त्यही परम्पराको निरन्तरतास्वरूप सेनाध्यक्ष सेठलाई यो मानपदवी प्रदान गरिएको हो ।

रक्षा मन्त्रालयको समेत जिम्मेवारी सम्हालिरहेका प्रधानमन्त्री शाहलाई भेटेर सेठ भारत फर्किँदैछन् । तीनदिने औपचारिक भ्रमणका लागि आइतबार नेपाल आएका सेठ प्रधानमन्त्री शाहलाई भेटेपछि स्वदेश फर्किने कार्यक्रम रहेको छ। उक्त भेटमा सम्भवत: बालेनको भारत भ्रमणबारे पनि कुरा हुन सक्नेछ ।

तस्बिरहरू: नेपाल फोटो लाइब्रेरी