काठमाडौं- नेपाली कांग्रेसकी प्रमुख सचेतक बासना थापाले शक्तिशाली सरकार हुँदासमेत जनताले राहत र सामान्य औषधिसमेत नपाउने अवस्था रहेको बताएकी छन् । उनले वालेन्द्र शाह नेतृत्वको सरकारको कार्यशैलीमाथि पनि गम्भीर प्रश्न उठाएकी छन् ।

मंगलबार बसेको प्रतिनिधि सभाको बैठकमा बोल्दै थापाले सुत्केरीले समयमा अस्पतालमा उपचार नपाउने तर मन्त्री बिरामी हुँदा राज्यले तत्काल हेलिकप्टर पठाएर काठमाडौं ल्याउने गरेको भन्दै आपत्ति जनाइन् ।

‘शक्तिशाली सरकार हुँदा पनि जनताले राहत र सिटामोलसमेत पाउँदैनन् । सुत्केरीले समयमा अस्पतालमा उपचार पाउँदैनन्,’ उनले भनिन्, ‘तर काठमाडौंमा मिनरल वाटर पिएका मन्त्री कर्णाली पुगेका बेला उताको पानी र खाना नपचाएर बिरामी पर्छन् । अनि उनलाई ल्याउन प्रधानमन्त्री लाखौँ खर्च गर्छन्।’

प्रधानमन्त्रीले मन्त्रीलाई काठमाडौं ल्याउन ३०/३५ लाख रुपैयाँ खर्च गरेर हेलिकप्टर पठाउन सक्ने तर तीन लाख रुपैयाँ खर्च गरेर जनतासम्म राहत पुर्‍याउन नसक्ने अवस्था रहेको उनको भनाइ थियो ।

‘बिहान–बेलुकाको छाक टार्नसमेत कठिन भएका जनतालाई सरकार राहत दिन सक्दैन । एक सिलिन्डर ग्यास पनि दिन सक्ने क्षमता राख्दैन,’ थापाले भनिन्, ‘मन्त्रीको जीवन जति मूल्यवान छ, कर्णालीका जनताको जीवन पनि उत्तिकै मूल्यवान छ।’

उनले सरकारको सुशासन र समतामूलक राज्यको अवधारणामाथि समेत प्रश्न उठाइन् । ‘यो कस्तो सुशासन हो ? सरकारले कान खोलेर सुनोस्, मन्त्रीका लागि हेलिकप्टर पुग्ने तर बिरामीका लागि अस्पताल नपुग्ने ? के यो यही समतामूलक राज्य हो ?’ उनले प्रश्न गरिन् ।

एकातिर एक्सप्रेस वे निर्माणको कुरा गर्ने र अर्कोतिर कर्णालीका नागरिकले औषधिसमेत नपाउने अवस्था रहेको भन्दै थापाले सरकारको प्राथमिकतामाथि पुनः प्रश्न उठाइन् ।

‘एकातिर भोकभोकै परेका नागरिकलाई सरकार एक सिलिन्डर ग्यास दिन सक्दैन । अर्कातिर मन्त्रीका लागि केही बेरमै हेलिकप्टर पुग्छ । बिरामीका लागि राज्य भनेका बेला नपुग्ने, यही हो राज्यको चरित्र ?’ उनले भनिन् ।