पोखरा– पृथ्वीराजमार्गअन्तर्गत पोखराको लेखनाथ सडकखण्ड विस्तारसँगै नयाँ स्वरूपमा देखिन थालेको छ । मुग्लिन–पोखरा सडक विस्तार आयोजनाअन्तर्गत सडक विस्तारपछि अहिले लेन मार्किङ, सडक संकेत, रंगरोगन, डिभाइडर, सुरक्षा बार तथा सौन्दर्यीकरणको काम भइरहेको छ ।

सडकलाई सुरक्षित र व्यवस्थित बनाउन लेन छुट्याउने मार्किङ, जेब्रा क्रसिङ, ट्राफिक संकेत बोर्ड तथा सडक सुरक्षा संरचना निर्माण र जडान गरिएको छ। सडकका विभिन्न संरचनामा रंगरोगन तथा सौन्दर्यीकरणले लेखनाथ क्षेत्रको सडक दृश्यसमेत आकर्षक बनेको छ ।

मुग्लिन–पोखरा सडक विस्तार आयोजनाअन्तर्गत आबुखैरेनी–जामुने करिब ४१ किलोमिटर र जामुने–पोखरा सेती पुल करिब ३८.७१ किलोमिटर सडकखण्डको निर्माण सम्पन्न भइसकेको छ । विस्तारसँगै कालोपत्रे, नाली, सर्भिस लेन, डिभाइडर र सडक सुरक्षा संरचना निर्माण गरिएको छ।

मुग्लिन–पोखरा सडक पृथ्वीराजमार्गको महत्वपूर्ण खण्ड हो । सडक विस्तारपछि काठमाडौं–पोखरा आवागमन थप सहज, सुरक्षित र व्यवस्थित हुने अपेक्षा गरिएको छ।