काठमाडौँ – मकवानपुरको भीमफेदीमा सवारी दुर्घटनामा परी घाइते भएका उच्च अदालत जनकपुरको अस्थायी इजलास वीरगन्जका न्यायाधीश गोकर्ण डाँगीसहित चार जनालाई उपचारका लागि नेपाली सेनाको हेलिकप्टरमार्फत काठमाडौँ ल्याइएको छ। नेपाली सेनाले उद्धार गरेर वीरेन्द्र अस्पताल, छाउनीमा ल्याइएको हो ।

जिल्ला प्रहरी कार्यालय मकवानपुरका अनुसार मंगलबार बिहान काठमाडौँबाट हेटौँडातर्फ जाँदै गरेको प्रदेश–३–००२ झ ५१८३ नम्बरको स्कार्पियो भीमफेदी गाउँपालिका–६ स्थित जुराखेतमा सडकबाट झन्डै ५० मिटर तल खसेर दुर्घटना भएको थियो।

दुर्घटनामा परी घाइते हुनुभएका दाङ तुलसीपुर उपमहानगरपालिका–९ का ५७ वर्षीय न्यायाधीश डाँगीको टाउको लगायत शरीरका विभिन्न भागमा चोट लागेको प्रहरीले जनाएको छ। उनीसँगै गाडीमा सवार अन्य पाँच जनासमेत घाइते भएका छन्।

हेलिकप्टरमार्फत काठमाडौँ ल्याइएका न्यायाधीश डाँगी, रजिष्ट्रारका छोरा रितेन्द्र बडु, छोरी रिता बडु र श्रीमती लक्ष्मी बडुलाई उपचारका लागि छाउनीस्थित सैनिक अस्पताल भर्ना गरिएको छ। घाइतेमध्ये लक्ष्मी बडुको अवस्था गम्भीर रहेको छ।

दुर्घटनामा परेर घाइते भएका उच्च अदालतका रजिष्ट्रार तारादत्त बडु र गाडी चालक छुनिलाल चौधरीको भने हेटौँडा अस्पतालमै उपचार भइरहेको जिल्ला प्रहरी कार्यालय मकवानपुरका डीएसपी माधव काफ्लेले जानकारी दिए।