काठमाडौं– २०२६ फिफा विश्वकपको उपाधि दौडबाट फ्रान्स र इङ्ग्ल्यान्ड बाहिरिए पनि गोल्डेन बुटको प्रतिस्पर्धा भने अझै समाप्त भएको छैन। 

तेस्रो स्थानका लागि हुने फ्रान्स र इङ्ग्ल्यान्डबीच आइतबार हुने खेलले प्रतियोगिताको सर्वाधिक गोलकर्ताको नाम परिवर्तन गर्न सक्ने सम्भावना छ।

विश्वकपमा तेस्रो स्थानका लागि हुने खेलमा गरिएका गोल पनि आधिकारिक तथ्यांकमा समावेश हुने भएकाले फ्रान्सका कप्तान किलियन एमबाप्पे, इङ्ग्ल्यान्डका ह्यारी केन र जुड बेलिङ्घमसँग गोल संख्या बढाउने अन्तिम अवसर हुनेछ।

हाल अर्जेन्टिनाका कप्तान लियोनेल मेस्सी र एमबाप्पे समान ८ गोलसहित गोल्डेन बुटको शीर्ष स्थानमा छन्। केन र बेलिङ्घमले ६–६ गोल गरेका छन् भने फ्रान्सका उस्मान डेम्बेले ५ गोलसहित प्रतिस्पर्धामा छन्।

तेस्रो स्थानका लागि फ्रान्स र इङ्ग्ल्यान्डबीचको खेल विश्वकप फाइनलअघि हुने भएकाले एमबाप्पेसँग मेस्सीभन्दा अघि निस्कने अवसर रहनेछ। 

यदि उनले गोल संख्या बढाए भने मेस्सीमाथि दबाब पर्नेछ। यद्यपि त्यसपछि स्पेनविरुद्धको फाइनलमा मेस्सीसँग फेरि अग्रता लिने अवसर हुनेछ।

यदि मेस्सी र एमबाप्पे समान गोलमै प्रतियोगिता टुंग्याए भने फिफाको नियमअनुसार सर्वप्रथम असिस्टको संख्या हेरिन्छ। त्यसमा पनि बराबरी भए कम समय खेलेर समान गोल गरेका खेलाडीलाई गोल्डेन बुट प्रदान गरिन्छ।

विश्वकप इतिहासमा तेस्रो स्थानको खेलले गोल्डेन बुटको विजेता तय गरेका उदाहरण पनि छन्। सन् १९९० को इटाली विश्वकपमा साल्भाटोरे स्किलाचीले इङ्ग्ल्यान्डविरुद्ध गोल गर्दै ६ गोलसहित गोल्डेन बुट जितेका थिए। 

त्यसैगरी १९९८ को फ्रान्स विश्वकपमा डाभोर शुकेरले नेदरल्यान्ड्सविरुद्ध गोल गर्दै ६ गोलसहित सर्वाधिक गोलकर्ताको सम्मान हात पारेका थिए।

त्यसैले यसपटक पनि फ्रान्स र इङ्ग्ल्यान्डबीचको तेस्रो स्थानको खेलले गोल्डेन बुटको दौडमा अन्तिम क्षणसम्म रोमाञ्चक मोड ल्याउन सक्ने अपेक्षा गरिएको छ।