काठमाडौं – राष्ट्रिय स्वतन्त्र पार्टी (रास्वपा) को सचिवालय बैठक बिहीबार बस्ने भएको छ। पार्टीको पहिलो महाधिवेशनको तयारी तथा समसामयिक संगठनात्मक विषयमा छलफल गर्न बैठक बोलाइएको हो।

रास्वपाले आगामी साउन ७ गतेदेखि आफ्नो पहिलो महाधिवेशन आयोजना गर्दैछ। महाधिवेशनमा देशभरबाट करिब २५ हजार प्रतिनिधिको सहभागिता रहने अपेक्षा गरिएको पार्टी स्रोतले जनाएको छ।

महाधिवेशनलाई व्यवस्थित र प्रभावकारी बनाउन पार्टी सभापति रवि लामिछानेले प्रदेशगत रूपमा सांसदहरूसँग संवादलाई तीव्रता दिएका छन्। महाधिवेशनको तयारी, संगठन विस्तार तथा भावी कार्यदिशाबारे विभिन्न तहमा परामर्श भइरहेको बताइएको छ।

सचिवालय बैठकपछि छिट्टै केन्द्रीय समिति बैठक समेत बोलाउने तयारी गरिएको छ। उक्त बैठकबाट नयाँ विधान पारित गर्ने योजना पार्टीको रहेको छ।

रास्वपाको नयाँ विधान मस्यौदा तयार गर्ने जिम्मेवारी पार्टीका सहमहामन्त्री विपिन आचार्यले सम्हालिरहेका छन्। विधानलाई अन्तिम रूप दिएर महाधिवेशनमार्फत अनुमोदन गराउने तयारी भइरहेको जनाइएको छ।