सियोल– दक्षिण कोरियाका राष्ट्रपति ली जे–म्युङले अमेरिकी राष्ट्रपति डोनाल्ड ट्रम्पलाई उत्तर कोरियासँगको तनाव कम गर्दै कोरियाली प्रायद्वीपमा शान्ति स्थापना गर्न सक्रिय भूमिका खेल्न आग्रह  गरेका छन् । 

अमेरिका र इरानबीच युद्ध अन्त्य तथा कूटनीतिक सहमतितर्फ प्रगति भइरहेका बेला सियोलले वासिङ्टनको ध्यान अब उत्तर कोरियाली मुद्दातर्फ केन्द्रित हुने अपेक्षा गरेको छ।

दक्षिण कोरियाको राष्ट्रपति कार्यालयले बुधबार जारी गरेको विज्ञप्तिअनुसार फ्रान्समा सम्पन्न  G7 शिखर सम्मेलनका क्रममा राष्ट्रपति ली र ट्रम्पबीच उत्तर कोरियासम्बन्धी विषयमा विस्तृत छलफल भएको थियो। वार्ताका क्रममा ट्रम्पले अन्तर–कोरियाली सम्बन्धको पछिल्लो अवस्थाबारे चासो व्यक्त गरेको राष्ट्रपति कार्यालयले जनाएको छ।

भेटवार्तामा राष्ट्रपति लीले मध्यपूर्वमा तनाव न्यूनीकरणका लागि ट्रम्पले खेलेको भूमिकाको प्रशंसा गर्दै उत्तर कोरियासम्बन्धी समस्याको शान्तिपूर्ण समाधानका लागि पनि नेतृत्वदायी भूमिका निर्वाह गर्न आग्रह गरेका थिए । त्यसको जवाफमा ट्रम्पले उत्तर कोरियासम्बन्धी मुद्दाको समाधानका लागि प्रयास जारी राख्ने प्रतिबद्धता व्यक्त गरे ।

अमेरिका र इरानबीच औपचारिक समझदारीपत्रमा हस्ताक्षरको तयारी भइरहेका बेला ट्रम्प प्रशासनले आफ्नो कूटनीतिक प्राथमिकता उत्तर कोरियातर्फ मोड्न सक्ने अनुमान अन्तर्राष्ट्रिय कूटनीतिक वृत्तमा बढेको छ।

यसैबीच ट्रम्पले सन् २०१८ मा सिङ्गापुरमा उत्तर कोरियाली नेता किम जोङ उनसँग भएको ऐतिहासिक शिखर वार्ताको तस्बिर सामाजिक सञ्जालमा पुनः सार्वजनिक गरेपछि वासिङ्टन–प्योङयाङ संवाद पुनर्जीवित हुन सक्ने अड्कलबाजीलाई थप बल पुगेको छ।

राष्ट्रपति लीले आफ्ना पूर्ववर्ती युन सुक येओलको तुलनामा उत्तर कोरियाप्रति अपेक्षाकृत संवादमुखी र नरम नीति अवलम्बन गरे। तर प्योङयाङले सियोललाई आफ्नो ‘सबैभन्दा शत्रुतापूर्ण शत्रु’को संज्ञा दिँदै आएको छ र आफूलाई ‘अपरिवर्तनीय आणविक राष्ट्र’ घोषणा गर्दै वार्ताप्रति विशेष चासो नदेखाएको बताइन्छ।

विशेषज्ञहरूले निकट भविष्यमा किम जोङ–उन र ट्रम्पबीच प्रत्यक्ष शिखर वार्ता हुने सम्भावना कमजोर रहेको बताएका छन्। सियोलस्थित 

उत्तर कोरियाली अध्ययन विश्वविद्यालयका पूर्वअध्यक्ष याङ मु–जिनका अनुसार हालको परिस्थितिमा उत्तर कोरियाले अमेरिकासँग वार्ता गर्नुपर्ने स्पष्ट रणनीतिक आवश्यकता देखिँदैन।

विश्लेषकहरूका अनुसार पछिल्ला वर्षहरूमा उत्तर कोरियाले आफ्नो कूटनीतिक दायरा विस्तार गर्ने प्रयास गरेको छ। युक्रेन युद्धका क्रममा रुसलाई सैनिक तथा हतियार सहयोग उपलब्ध गराएको आरोपका कारण प्योङयाङ र मस्कोबीचको सम्बन्ध थप सुदृढ बनेको छ।

हालै किम जोङ–उनले प्योङयाङमा चिनियाँ राष्ट्रपति सी जिनपिङ लाई स्वागत गरेका थिए। उक्त भेटअघि सी जिनपिङले बेइजिङमा ट्रम्प र रुसी राष्ट्रपति  भ्लादिमिर पुटिनसँग छुट्टाछुट्टै शिखर वार्ता गरे।

विशेषज्ञहरूका अनुसार प्योङयाङ र बेइजिङले जारी गरेका पछिल्ला आधिकारिक वक्तव्यहरूमा उत्तर कोरियाले आफ्नो आणविक हतियार कार्यक्रम त्याग्नुपर्ने विषय उल्लेख नगरिनुले चीनले उत्तर कोरियाको आणविक हैसियतप्रति मौन समर्थन जनाएको सङ्केत हुन सक्ने विश्लेषण गरिएको छ।