काठमाडौं– रूपन्देहीको बुटवलमा अव्यवस्थित बसोबासी तथा भूमिहीन सुकुम्वासीहरूले प्रदर्शन गरेका छन्। सरकारले वर्षौंदेखि बसोबास गर्दै आएका सुकुम्वासीलाई विकल्पविना हटाउन खोजेको भन्दै देशभरका सुकुम्वासीहरूले विरोध प्रदर्शन गरेका हुन् ।

नेपाल भूमिहीन सुकुम्वासी तथा अव्यवस्थित बसोबासी संघर्ष समिति, रूपन्देहीको आयोजनामा भएको प्रदर्शन बुटवलको राजमार्ग चौराहाबाट सुरू भएको थियो । 

प्रदर्शनकारीहरूले राजमार्ग चौराहा, मिलनचोक, बसपार्क, पुष्पलाल पार्क हुँदै ट्राफिक चोकसम्म र्‍याली निकालेका थिए। पछि ट्राफिक चोकमा पुगेर विरोध सभा गरिएको थियो ।

प्रदर्शनमा विशेषगरी तराईका २२ जिल्लाबाट आएका सुकुम्वासीहरूको सहभागिता रहेको आयोजकले जनाएको छ । 

संघर्ष समितिका संयोजक खगेन्द्र पौडेलका अनुसार सरकारले विकल्पविना गरिब सुकुम्वासी तथा अव्यवस्थित बसोबासीका घरटहरामा डोजर चलाएर हटाउने तथा विस्थापित गर्ने प्रयास गरेकाले विरोधमा उत्रिनुपरेको हो ।

तस्बिर : नेपाल फोटो लाइब्रेरी