काठमाडौं -पूर्व राष्ट्रपति विद्यादेवी भण्डारी ले स्वर्गीय मदन भण्डारी र जिवराज आश्रितले नेपाली कम्युनिष्ट आन्दोलनलाई संगठनात्मक उचाइसँगै वैचारिक स्पष्टता र जनमुखी राजनीतिक संस्कारको नयाँ चरणमा पुर्‍याएको बताएकी छन् ।

आइतबार बल्खुस्थित मदननगरमा आयोजित ३३औँ मदन–आश्रित स्मृति सभालाई सम्बोधन गर्दै उनले दुई नेताले जनताको जीवनसँग प्रत्यक्ष जोडिएको राजनीति अभ्यास गरेको स्मरण गरिन् ।

भण्डारीले राजनीति जनताको विश्वासबाट निर्देशित हुनुपर्छ भन्ने मान्यतालाई मदन भण्डारी र जिवराज आश्रितले गहिरोसँग स्थापित गरेको उल्लेख गरिन् । उनले नेपाल कम्युनिष्ट पार्टी (एमाले) ले मार्गनिर्देशक सिद्धान्तका रूपमा अपनाएको ‘जनताको बहुदलीय जनवाद’ नेपाली समाजको यथार्थमा आधारित मौलिक राजनीतिक विचार भएको बताइन् ।

उनले मदन भण्डारी र जिवराज आश्रितले नेपाली कम्युनिष्ट आन्दोलनलाई केवल संगठन विस्तारमा सीमित नराखी वैचारिक रूपमा पनि सुदृढ बनाएको धारणा व्यक्त गरिन् । राजनीतिलाई जनताको जीवनसँग जोडिएको विषयका रूपमा स्थापित गर्न दुई नेताको महत्वपूर्ण योगदान रहेको उनको भनाइ थियो ।