काठमाडौं– वैशाख १ देखि जेठ ३ गतेसम्मको अवधिमा देशभर भएका विभिन्न १ हजार १७३ वटा विपद्का घटनामा परी ५९ जनाको मृत्यु भएको छ ।
 
विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको तथ्याङ्क अनुसार यस अवधिमा विपद्का कारण २७८ जना घाइते भएका छन् भने १ हजार ४८० परिवार प्रभावित भएका छन् । 

यो एक महिनाको अवधिमा सबैभन्दा बढी मानवीय क्षति चट्याङ र लेक लाग्ने समस्याका कारण भएको छ । १२६ वटा चट्याङका घटनामा परी १४ जनाको मृत्यु भएको छ भने ७५ जना घाइते भएका छन् । चट्याङबाट १४६ परिवार प्रभावित बनेका छन् । 

त्यसैगरी, २१ वटा लेक लाग्ने घटनामा ११ जनाले ज्यान गुमाएका छन् भने ११ जना घाइते र २१ परिवार प्रभावित भएका छन् ।

यस अवधिमा सबैभन्दा धेरै घटना आगलागीका भएका छन् । मुलुकभर ४१८ पटक भएका आगलागीका घटनामा परी १० जनाको मृत्यु भएको छ भने ४८ जना घाइते भएका छन् ।

आगलागीबाट ४८६ परिवार प्रभावित भएका प्राधिकरणको तथ्यांकमा उल्लेख छ । 

त्यस्तै हावाहुरीका कारण ९ जनाको ज्यान गएको छ भने ३६ जना घाइते भएका छन् । हावाहुरीबाट सबैभन्दा बढी ५९३ परिवार प्रभावित भएका छन् । वन डढेलो र जंगली जनावरको आक्रमण पनि यो अवधिमा घातक देखिएका छन् । 

४८ वटा जनावर आक्रमणका घटनामा ५ जनाको मृत्यु र २७ जना घाइते भएका छन् । १३७ ठाउँमा लागेको वन डढेलोका कारण १ जनाको मृत्यु र २ जना घाइते भएका छन् ।

यसबाहेक सर्पदंशबाट ३, डुङ्गा पल्टिँदा २, पहिरोबाट २, बाढीबाट १ र हिउँ पहिरोमा परी १ जनाको मृत्यु भएको तथ्याङ्कले देखाएको छ । 

भारी वर्षाका ३१ र असिनापानीका ४ वटा घटना दर्ता भए पनि यसबाट मानवीय क्षति भने भएको छैन ।