काठमाडौं – नेपाली कांग्रेसका महामन्त्री प्रदीप पौडेलले आधिकारिकतासम्बन्धी विवादमा सर्वोच्च अदालतले दिएको फैसला स्वीकारेर पार्टी एकता जोगाउनु पर्न गर्ने बताएका छन् ।

पार्टीका महामन्त्री पौडेलले सर्वोच्चको उक्त निर्णयलाई हार–जीतको रूपमा व्याख्या नगर्न आग्रह गरेका छन् ।

महामन्त्री पौडेलले अदालतको फैसला कसैको हार वा जीतको विषय नभएको उल्लेख गर्दै त्यसलाई विवादका रूपमा प्रस्तुत गर्दा पार्टी एकता प्रभावित हुन सक्ने बताएका छन् ।

उनले यस्तो अवस्थामा सबै नेता, कार्यकर्ता र शुभेच्छुक सचेत रहनुपर्ने आवश्यकता औंल्याए ।

उनले अब सबैलाई सुरक्षित महसुस हुने वातावरण निर्माण गर्दै चारतारे झण्डामुनि पुनः गोलबद्ध हुन आह्वान गरेका छन् ।

यसका साथै आगामी १५औँ महाधिवेशनलाई लक्षित गर्दै पार्टीभित्र एकता सुदृढ गर्न सक्रिय हुन सबैमा उनले अपिल गरेका छन् ।

महामन्त्री पौडेलले कांग्रेसका नेता, कार्यकर्ता तथा शुभेच्छुकलाई पार्टी एकता कायम राख्दै आगामी महाधिवेशनतर्फ अघि बढ्न आग्रह गरेका छन् ।