काठमाडौं – आईसीसी विश्वकप लिग–२ सिरिजका लागि नेपालले रोहितकुमार पौडेलको कप्तानीमा १५ सदस्यीय टोली घोषणा गरेको छ । यूएई र ओमानविरुद्ध हुने सिरिजका लागि नेपाल क्रिकेट संघ (क्यान)ले टोली सार्वजनिक गरेको हो ।

टोली छनोटमा प्रधानमन्त्री कपको प्रदर्शनलाई आधार बनाइएको क्यानले जनाएको छ । यसक्रममा युवा ब्याटर अर्जुन कुमालले पहिलोपटक राष्ट्रिय टोलीमा स्थान बनाएका छन् । त्यस्तै ओपनर तथा विकेटकिपर विनोद भण्डारी तीन वर्षपछि टोलीमा फर्किएका छन् ।

नेपालले लिग–२ अन्तर्गत दुई महिनाभित्र दुई त्रिकोणात्मक सिरिज खेल्नेछ । पहिलो सिरिजमा नेपाल, ओमान र यूएईबीच प्रतिस्पर्धा हुनेछ भने दोस्रो सिरिजमा नेपाल, अमेरिका र स्कटल्यान्ड आमनेसामने हुनेछन् ।

पहिलो सिरिज वैशाख १२ देखि २२ गतेसम्म कीर्तिपुरस्थित त्रिवि क्रिकेट मैदानमा हुनेछ । दोस्रो सिरिज वैशाख २९ देखि जेठ ८ गतेसम्म सोही मैदानमा आयोजना हुनेछ।