काठमाडौं- पछिल्लो २४ घण्टामा देशका विभिन्न स्थानमा २९ वटा विपद्का घटना दर्ता भएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको बुलेटिनअनुसार उक्त घटनामा एक जनाको मृत्यु भएको छ भने दुई जना बेपत्ता भएका छन् ।

प्राधिकरणका अनुसार विपद्का घटनामा चार जना घाइते भएका छन् । भौतिक क्षतितर्फ करिब ४७ लाख ४१ हजार ५०० रुपैयाँ बराबरको नोक्सानी भएको छ भने एक चौपायाको मृत्यु भएको छ । बितेको २४ घण्टामा १५ जिल्लामा १९ वटा आगलागीका घटना भएका छन् । ती घटनामा नियन्त्रणका लागि १५२ जना नेपाल प्रहरी परिचालन गरिएको प्राधिकरणले जनाएको छ ।

यस्तै, ४ जिल्लाका ५ स्थानमा वन डढेलो लागेको छ । त्यस्तै डुङ्गा दुर्घटनामा परी दुई जना बेपत्ता भएका छन् । लेक लागेर एक जनाको मृत्यु भएको छ । सर्पदंशका दुई घटनामा दुई जना घाइते भएका छन् भने जनावर आक्रमणका दुई घटनामा दुई जना घाइते भएका छन् ।

उद्धार तथा व्यवस्थापनका लागि देशभर १८० जना नेपाल प्रहरी परिचालन गरिएको छ । यस अवधिमा सडक अवरोधका कुनै पनि घटना नभएको प्राधिकरणले जनाएको छ । प्राधिकरणले सुक्खा मौसमसँगै आगलागी र डढेलोको जोखिम बढेकाले उच्च सतर्कता अपनाउन सर्वसाधारणलाई आग्रह गरेको छ ।