काठमाडौं– सार्वजनिक लेखा समितिका सभापति भरत खड्काले जिम्मेवारी सम्हाल्दै आर्थिक सुशासन र वित्तीय अनुशासन कायम गर्न कडाइका साथ अघि बढ्ने बताएका छन्।

समिति सभापति निर्वाचित भएपछि सञ्चारकर्मीहरूसँग कुरा गर्दै उनले विगतका विसंगति दोहोरिन नदिने र संघदेखि स्थानीय तहसम्म आर्थिक अनुशासन लागू गरिने बताए। 

‘विगतका केही विसंगतिहरू पनि छन्, अब ती दोहोरिनेवाला पनि छैनन्। अहिलेको मुलुकको माग भनेको आर्थिक अनुशासन र वित्तीय सुशासन हो। यो कायम नगरी मुलुक अगाडि बढ्दैन, सुशासनको अनुभूति पनि हुँदैन’ उनले भने ।

विभिन्न निकायको नाममा काममा हुने ढिलासुस्ती अब सह्य नहुने उल्लेख गर्दै उनले सबै निकायलाई कानुनभित्र बसेर समयमै काम गर्न निर्देशन दिए।

खड्काले बहानाबाजी अन्त्य गर्दै जनतालाई प्रभावकारी सेवा दिनुपर्नेमा जोड दिँदै यसलाई आफ्नो लागि चुनौती र अवसर दुवै भएको बताए।

 सांसद मोहन आचार्य प्रस्तावक र सांसद जनकराज गिरीको समर्थनमा खड्काले बिहीबार समिति सभापति पदमा मनोनयन दर्ता गराएका थिए ।