काठमाडौं – सन् २०१९ सम्म पहिलो रोजाइमा रहेकी नायिका प्रियंका कार्की पछिल्लो समय खाली नै छन् भन्दा फरक पर्दैन ।
पछिल्लो समय प्रियंका शीर्ष भूमिकामा रहेको फिल्म नै प्रदर्शनमा आएको छैन । उनी अनुबन्ध भएको पनि सुनिएको छैन । सहायक भूमिकामा भए पनि उनले फिल्म गरिरहेकी छन् ।
कुनै समयकी व्यस्त नायिका सहायक भूमिकामा खुम्चिनुले उनको व्यवसायिक ग्राफ ओरालो लागेको नै देखिन्छ ।
गत वर्ष उनले गीत ‘मकै बारी दर्याम दर्याम’मा मोडलिङ गर्दा नै ‘फिल्म नपाएर सी ग्रेडको म्युजिक भिडियो गरिन्’ भन्ने चर्चा नभएको होइन । उनले दर्शकै तहबाट यो प्रतिक्रिया सुन्नुपर्यो ।
अहिले उनी आफ्नै होम प्रोडक्सनको फिल्म ‘मास्टर्नी’ प्रदर्शनको तयारीमा छन् । आफैँ निर्माता र शीर्ष नायिका बनेकी छन् ।
ट्रेलर रिलिज कार्यक्रममा उनलाई ‘लिड रोल नपाएर आफैँ फिल्म निर्माणमा लागेको हो ?’ भन्ने प्रश्न गरिएको थियो ।
प्रियंकाले आफूले काम नपाएको भन्ने प्रश्नको खण्डन गर्न चाहिनन् । बरु भनिन्, ‘जसले जे सोच्दा नि हुन्छ ।’
तथापि, फिल्म निर्माणमा आफ्नो अर्को पाइला भएको बताइन् । पूर्वनिर्णयमै निर्माण हात हालेको बताउँदै उनले थपिन्, ‘मेरो लागि भनेको फिल्म निर्माण अर्को पाइला हो । सन् २०२६ बाट निर्माताका रुपमा आउँछु भन्ने पनि थियो ।’
पछिल्लो दुई वर्ष आफू यही फिल्मको स्क्रिप्टको काममा व्यस्त रहेको उनको आशय थियो ।
‘लिड रोलकै लागि फिल्ममा आएको हो ?’ भन्ने विश्लेषणात्मक प्रश्नमा उनेको जवाफ छ, ‘प्रोडक्सन हाउस खोलेर प्रत्येक वर्ष आफूलाई मन परेको रोल गर्ने क्षमता छ भने, म त्यो गर्छु ।’
प्रियंकाको ‘मास्टर्नी’ भदौ १२ गते प्रदर्शनमा आउँदै छ । उनको यो डेब्यू निर्माण हो ।
प्रतिक्रिया