काठमाडौं- नेकपा एमालेका महासचिव शंकर पोखरेलले अहिले राष्ट्रिय स्वतन्त्र पार्टी cको जगमा दुईतिहाइ बहुमतमा पुगेको बताएका छन् ।

प्रदेश तथा जिल्ला अध्यक्षहरूसँग भएको भर्चुअल जुम बैठकलाई सम्बोधनका क्रममा उनले यस्तो बताएका हुन् ।

‘लोकप्रियतावाद र अराजकतावादको जगमा नयाँ शक्ति उदाएका छन्’, रास्वपालाई संकेत गर्दै उनले भने, ‘रास्वपाभित्र लोकप्रियतावादी र अवसरवादीहरूको गठजोड रहेको छ । त्यस्ता शक्तिहरूसँग राष्ट्र र राष्ट्रियताप्रति स्पष्ट विचार, सिद्धान्त तथा दीर्घकालीन राजनीतिक दृष्टि छैन ।’

उनले यस्ता शक्तिहरू छिटो लोकप्रियता कमाउने र तत्काल परिणाम दिने वाचा गर्दै अघि बढ्ने तर व्यवहारमा नसक्ने अवस्था आउने बताए ।

अध्यक्ष केपी शर्मा ओली र एमालेविरुद्ध नयाँ र पुरानो अनुहार भन्ने नारामा आधारित प्रचार गरेर जनतालाई भ्रमित पारिएको उनले बताए। यस्तो प्रचार शैली डिजिटल माध्यमबाट फैल्याइएको लोकप्रियतावादकै एउटा रूप भएको उनले जिकिर गरे ।

महासचिव पोखरेलले जनमतलाई एमालेले सम्मान गर्ने स्पष्ट गरे । मतदाताले एमालेसँग सम्बन्ध विच्छेद नगरेको दाबी उनले गरे।

हरेक समाज र घरमा एमालेको उपस्थिति रहेको उल्लेख गर्दै पार्टीले अब थप नयाँ ढंगले संगठन निर्माण र परिचालनलाई तीव्र बनाउने उनले बताए ।

पोखरेलले अल्पकालीन लोकप्रियताका आधारमा आएका शक्तिहरूले अपेक्षित परिणाम दिन नसकेपछि अन्ततः जनता स्थिर विचार र संगठित शक्ति भएको एमालेतर्फै फर्किने विश्वास जनाए ।