काठमाडौं- साउदी अरबमा आयोजित विश्व रक्षा प्रदर्शनीमा भारतका तर्फबाट रक्षा राज्यमन्त्री सञ्जय सेठ सहभागी भएका छन् । उनी नेतृत्वको उच्चस्तरीय टोलीले साउदी अरबमा भारतको प्रतिनिधित्व गरेको भारतीय समाचार संस्था एएनआईले जनाएको छ ।

राज्यमन्त्री सेठले प्रदर्शनीमा सहभागी उच्चस्तरीय अन्तर्राष्ट्रिय प्रतिनिधिसँग भेटवार्ता गरेका छन् । उनले प्रदर्शनीमा भारतको पहिलो पेभेलियनको पनि उद्घाटन गरेको एएनआईले जनाएको छ ।

भारतीय रक्षा मन्त्रालयका अनुसार भारतीय पेभेलियनमा डिफेन्स पब्लिक सेक्टर अण्डरटेकिङ र निजी कम्पनीले आफ्ना उत्पादनको प्रदर्शन गरेका थिए । रक्षा राज्यमन्त्रीले साउदी अरबको सैन्य उद्योग मन्त्रालय र रक्षा मन्त्रालयका प्रदर्शनीस्थलको पनि निरीक्षण गरेको एएनआईले जनाएको छ ।

राज्य मन्त्रीले साउदी अरबको कार्यकारी मामिलासम्बन्धी सहायक रक्षामन्त्री खालेद बिन हुसैन अल बियारीसँग पनि भेटवार्ता गरेको भारतीय रक्षा मन्त्रालयले जनाएको छ । भेटवार्ताका क्रममा दुई देशबीच रक्षा साझेदारी र दुबै मुलुकका सैन्य बलबीच सहकार्य बढाउने विषयमा छलफल भएको छ ।