काठमाडौं- नेपाली कांग्रेसका नेता वीरेन्द्रकुमार कनौडिया शनिबार नेकपा एमालेमा प्रवेश गरेका छन् ।

कांग्रेसबाटै प्रतिनिधिसभाका लगि कपिलवस्तु क्षेत्र नम्बर ३ बाट एकल सिफारिस भएका पूर्व सहायक मन्त्री एवम् लुम्बिनी प्रदेशसभा सदस्य कनौडियालाई एमाले अध्यक्ष ओलीले पार्टीमा स्वागत गरे ।

शनिबार दिउँसो काठमाडौंमा ओलीबाट सदस्यता ग्रहण गर्दै उनी एमालेमा प्रवेश गरेका हुन् ।

कांग्रेस दुई टुक्रा भएसँगै माथिल्लोस्तरका नेताले पार्टी छाडेका हुन् । कनौडियाले एमाले प्रवेश गर्दा कपिलवस्तु क्षेत्र नम्बर ३ को टिकट पनि पक्का गरेका छन् । उनलाई ओलीले कपिलवस्तु ३ मा तयारी थाल्न भनिसकेका छन् । एमालेले शनिबार नै १६५ क्षेत्रको टिकट तय गर्दैछ ।

यसअघि २०७४ को प्रदेशसभा निर्वाचनमा उनी लुम्बिनी प्रदेश सभा सदस्य भएका थिए । उनी त्यसबेला प्रदेशसभा संसदीय दलको नेता पनि भएका थिए ।