एजेन्सी- संयुक्त राष्ट्रका शान्ति सञ्चालन सम्बन्धी सह-सचिव जाँ-पिएरे लाक्रोइक्सले लेबनानी सेनाले देशको दक्षिणी सिमाना सुरक्षित राख्न आफ्नो क्षमता थप बलियो बनाउन अन्तर्राष्ट्रिय समुदायको सहयोग आवश्यक रहेको बताएका छन्।

शुक्रबार पत्रकारसँग कुरा गर्दै उनले लेबनानी सेनाको संख्या र उपस्थितिमा वृद्धि भइरहेको उल्लेख गरे। उनले यसलाई सकारात्मक संकेत भने पनि क्षमता सुदृढीकरणका लागि अझै पर्याप्त स्रोत र आर्थिक सहयोग आवश्यक रहेको बताए।

 ‘लेबनानी अधिकारी र सेनाले दुवैले क्षमता बलियो बनाउन थप सहयोग चाहिएको स्वीकार गरेका छन्,’ उनले भने।

लाक्रोइक्सका अनुसार लेबनानी पक्षले संयुक्त राष्ट्रको अन्तरिम बल युनिफिलका केही स्रोत अस्थायी रूपमा निरन्तर राख्ने इच्छा व्यक्त गरेको छ। यसले सेनाको क्षमता अभिवृद्धिमा सहयोग पुग्ने अपेक्षा गरिएको छ।

उनले लक्ष्य स्पष्ट रहेको तर त्यसतर्फ पुग्न अझै केही काम बाँकी रहेको बताए। साथै लेबनानी प्रहरी र सुरक्षा निकायले पनि अन्तर्राष्ट्रिय समुदायबाट निरन्तर सहयोगको आवश्यकता औंल्याउँदै आएको जानकारी दिए।

लेबनान र इजरायलबीच सम्भावित तनावका विषयमा प्रश्न उठ्दा सह-सचिवले संयुक्त राष्ट्र र युनिफिलले उपलब्ध सबै उपाय प्रयोग गरेर हालका प्रयासलाई सहयोग गर्ने स्पष्ट पारे। यसबाट दुबै पक्षबीचको तनाव कम गर्न मद्दत पुग्ने आशा गरिएको उनले बताए।