बागलुङ–  पर्वत र बागलुङको सीमाना मालढुङ्गास्थित काली पुल मर्मतपछि पुनः सञ्चालनमा आएसँगै प्रसिद्ध धार्मिकस्थल बागलुङ कालिका मन्दिरमा भक्तजनको आगमन बढ्न थालेको छ ।

असोज २६ गतेदेखि पुल सञ्चालनमा आएपछि पछिल्लो तीन दिनयता बाहिरी जिल्लाबाट आउने भक्तजनको सङ्ख्या बढ्न थालेको कालिका भगवती गुठी व्यवस्थापन समितिले जनाएको छ ।

असोज ११ गते कालीगण्डकी नदीमा आएको बाढीले पर्वत र बागलुङ जोड्ने पुलको पहुँच मार्ग बगाएपछि १५ दिनसम्म यातायात सेवा अवरुद्ध भएको थियो । पुल सञ्चालनमा नआउँदा दसैँका लागि कालिका मन्दिर आउने भक्तजन प्रभावित भएका थिए ।

यद्यपि, यस वर्ष देशभर बाढीपहिरोलगायत विपद्का घटना बढेकाले विगतका वर्षको तुलनामा मन्दिरमा भक्तजनको चहलपहल कम छ । घटस्थापनादेखि नै दैनिक हजारौँ भक्तजन आउने गरेको मन्दिरमा यस वर्ष अपेक्षाकृत कम उपस्थिति देखिएको हो ।

गत वर्ष घटस्थापनाका दिन करिब १० हजार भक्तजन आएकोमा यस वर्ष करिब दुई हजार मात्रै आएका थिए । विपद्का कारण यस वर्ष भक्तजनको आगमन गत वर्षको तुलनामा उल्लेख्य घटेको हो ।

मालढुङ्गादेखि मुस्ताङको मुक्तिनाथ जाने सडकसमेत केही दिनअघि मात्रै सञ्चालनमा आएकाले त्यस क्षेत्र हुँदै आउने भक्तजनको आवागमन प्रभावित भएको थियो ।

दसैँका अवसरमा बागलुङ कालिका मन्दिरमा पूजाआजा गर्ने तथा पञ्चबलि दिने भक्तजनको भीड लाग्ने गर्छ । तर, यस वर्ष विपद्का घटनाका कारण पञ्चबलि दिन आउने भक्तजनको सङ्ख्यासमेत न्यून रहेको छ ।