काठमाडौँ । रुसी सेनाले बुधबार राति युक्रेनमा ठुलो मात्रामा आक्रमण गरेको रुसी समाचार एजेन्सी तासले रुसको रक्षा मन्त्रालयलाई उद्धृत गर्दै जनाएको छ।

रुसको रक्षा मन्त्रालयले भनेको छ, ‘युक्रेनका धातु विज्ञान र रेडियो-इलेक्ट्रोनिक्स उद्योगसँग सम्बन्धित सुविधा, साथै रक्षा उद्योग र ऊर्जा पूर्वाधारसँग सम्बन्धित केन्द्रलाई निसाना बनाइएको हो। आक्रमण किभ, जापोरिजिया र ओडेसा क्षेत्रमा गरिएको हो।’

मन्त्रालयका अनुसार रुसी सेनाले जमिन, समुद्र र हावाबाट सटिक हतियार, साथै ड्रोन प्रयोग गरेर ठुलो मात्रामा आक्रमण गरेको थियो। युक्रेनी नौसेना जहाजलाई पनि निसाना बनाइयो।

यसअघि युक्रेनका राष्ट्रपति भोलोदिमिर जेलेन्स्कीले बुधबार मिनीबसमा गरिएको ड्रोन आक्रमणमा कम्तीमा पाँच जनाको मृत्यु भएको बताएका थिए।