एजेन्सी– ब्राजिलका राष्ट्रपति लुइज इनासिओ लुला दा सिल्भाले राष्ट्रपति डोनाल्ड ट्रम्पलाई ब्राजिलको चुनावमा हस्तक्षेप नगर्न आग्रह गर्ने बताएका छन् ।

आगामी साता संयुक्त राष्ट्रसङ्घको महासभाका क्रममा ट्रम्पसँग भेट भए यस्तो आग्रह गर्ने बताएका हुन् ।

अक्टोबरमा हुने राष्ट्रपतीय चुनावलाई लिएर ब्राजिल र अमेरिकाबीच तनाव बढिरहेका बेला लुलाले यस्तो धारणा सार्वजनिक गरेका हुन् । ब्रासिलियामा आयोजित एक चुनावी कार्यक्रममा उनले महासभाका क्रममा ट्रम्पसँग कुराकानी गर्ने र ‘ब्राजिलको चुनावमा हस्तक्षेप नगर्न’ आग्रह गर्ने बताएका हुन् ।

ब्राजिलको विदेश मन्त्रालयका अधिकारी कार्लोस बिकालो कोजेन्डेले भने दुई नेताबीच विशेष द्विपक्षीय बैठक तय नभएको बताएका छन् । यद्यपि, गत वर्षजस्तै महासभाका क्रममा दुई नेताबीच भेट हुन सक्ने उनको भनाइ छ।

अमेरिकाले जुलाईमा ब्राजिलबाट आयात हुने वस्तुमा दुई चरणमा नयाँ शुल्क लगाएपछि लुलाले त्यसलाई आर्थिक दबाबमार्फत ब्राजिलको चुनाव प्रभावित पार्ने प्रयासका रूपमा आलोचना गरेका थिए ।

ट्रम्प प्रशासनसँग ब्राजिलको तनाव सन् २०२५ मा पूर्वराष्ट्रपति जाइर बोल्सोनारोमाथि चलेको मुद्दालाई लिएर अमेरिकाले ब्राजिलमाथि पहिलो चरणको शुल्क लगाएपछि थप बढेको हो।