काठमाडौं– राष्ट्रिय स्वतन्त्र पार्टीका सांसद यज्ञमणि न्यौपानेले त्रिभुवन विमानस्थलको कार्गोमा विपद्का लागि विदेशी दातृ निकाय तथा विभिन्न देशले पठाएका राहत सामग्री अलपत्र अवस्थामा रहेको बताएका छन् ।

बिहीबार प्रतिनिधिसभा बैठकमा बोल्दै उनले विमानस्थलमा लत्ताकपडालगायत ठूलो परिमाणमा राहत सामग्री थन्किएको उल्लेख गर्दै सम्बन्धित क्षेत्रबाट माग नआएको भन्दै ती सामग्री वितरण नभएको जानकारी पाएको बताए । 

विभिन्न संस्थाले पठाएका सामग्री लिन जाँदा भन्सार लाग्ने जानकारी पाएपछि उनीहरू फर्किने गरेको समेत कर्मचारीबाट सुनेको उनको भनाइ छ ।

सांसद न्यौपानेले विगतमा कोरोनाका बेला विदेशीबाट प्राप्त २० कन्टेनर सामग्रीसमेत प्रयोग नभई खेर गएको उदाहरण दिँदै अहिले आएका राहत सामग्री पनि त्यसैगरी खेर जान नदिन सरकारको ध्यानाकर्षण गराए ।

उनले रसुवा विपद्पीडित क्षेत्रमा सामग्रीको आवश्यकता भए तत्काल पठाउन र माग नभए अन्य विपद्का लागि प्रयोग हुने गरी व्यवस्थापन गर्न सरकारसँग आग्रह गरे । 

साथै, विमानस्थलमा राहत सामग्री थन्किएको अवस्थामा विपद्पीडित नागरिकले आवश्यक मलमपट्टी गर्ने सामग्री नपाउने अवस्था आउन नहुने बताए ।