काठमाडौँ – स्वास्थ्य तथा खाद्य स्वच्छता मन्त्री निशा मेहता र नेपालका लागि साउदी अरबका राजदूत फहद मोहम्मद ए म्निख्र बीच बिहीबार शिष्टाचार भेटवार्ता भएको छ।

मन्त्री मन्त्रालयमा भएको भेटका क्रममा नेपाल–साउदी अरब सम्बन्ध, आपसी सहकार्य तथा स्वास्थ्य क्षेत्रमा गर्न सकिने सम्भावित सहयोगका विविध विषयमा गहन छलफल भएको हो।

सो अवसरमा राजदूत म्निख्रले भोटेकोशीमा आएको विनाशकारी बाढीबाट नेपालमा पुगेको क्षतिप्रति साउदी सरकारको तर्फबाट ऐक्यबद्धता जनाउँदै आवश्यक सहयोगका क्षेत्रहरूलाई उच्च प्राथमिकतामा राखेर अघि बढाउने प्रतिबद्धता व्यक्त गरे।

भेटमा मन्त्री मेहताले नेपाल र साउदी अरबबीचको सम्बन्ध सुमधुर रहेको उल्लेख गर्दै यसै वर्ष मनाइँदै गरिएको दुई देशबीचको कूटनीतिक सम्बन्ध स्थापनाको स्वर्ण जयन्तीलाई थप अर्थपूर्ण बनाउनुपर्नेमा जोड दिइन्। उनले दुई देशको कूटनीतिक सम्बन्धका साथै जनस्तरमा समेत सहकार्य विस्तार गर्नुपर्ने धारणा राखिन्।