काठमाडौं – पत्रकार किशोर श्रेष्ठ जिल्ला प्रहरी परिसर काठमाडौंको हिरासतबाट छुटेका छन्। सर्वोच्च अदालतको आदेशपछि श्रेष्ठलाई हिरासतबाट मुक्त गरिएको हो ।

सर्वोच्चले श्रेष्ठलाई हिरासतमा राखिरहन आवश्यक नदेखिएको भन्दै हाजिर जमानी वा तारिखमा राखेर अनुसन्धान अघि बढाउन आदेश दिएको थियो । अदालतले समाचार प्रकाशित गरेकै आधारमा सम्पादक वा प्रकाशकलाई थुनामा राख्नुपर्ने अवस्था नदेखिएको समेत स्पष्ट गरेको छ ।

एक युवतीको तस्बिरसहित जनआस्थामा प्रकाशित सामग्रीलाई लिएर श्रेष्ठविरुद्ध वैयक्तिक गोपनीयता उल्लङ्घनको जाहेरी परेको थियो । अदालतमा उक्त तस्बिर जाहेरवालाले नै आफ्नो फेसबुकमा सार्वजनिक गरेको प्रमाणसमेत पेश भएको थियो ।

सर्वोच्चले सामाजिक सञ्जालमा व्यक्तिले आफैँ सार्वजनिक गरेको सामग्रीलाई सञ्चारमाध्यमले प्रकाशन गरेको मात्रै आधारमा फौजदारी कसुरको रूप दिन र सम्पादकलाई थुनामा राख्न उचित नहुने व्याख्या गरेको छ।

यता श्रेष्ठविरुद्ध उपसभामुख रूवी कुमारी ठाकुरले पनि जोहेरी दिएकी छन् । सोहीकारण पुनः कानुनी प्रक्रियामा तानिने वा धरपकड हुन सक्ने सम्भावना छ ।