वालिङ– मनबहादुर सार्कीले बाँझो जमिन भाडामा लिएर व्यावसायिक अकबरे खेती सुरु गरेका छन् ।

उनले वार्षिक ४५ हजारमा १५ रोपनी जग्गा भाडामा लिएका छन् । यतिखेर सार्की परिवारको जीवन गुजाराको प्रमुख आधार अकबरे खुर्सानी बनेको छ । 

बाँदरले नखाने, बजार मूल्य राम्रो र खेती गर्न सरल हुने भएकाले उनले अकबरे खुर्सानीको व्यावसायिक खेती सुरु गरेका हुन् । 

‘१५ रोपनी जग्गामा १५ हजार अकबरेका बोटहरू लगाएको छु,’ उनले भने, ‘अहिले त आम्दानी लिन थालिसकेको छु ।’ 

उनले हालसम्म ८०० केजी खुर्सानी प्रतिकेजी २०० का दरले बिक्री गरिसकेका छन् । उनले छोटो अवधिमा खुर्सानी बिक्रीबाट एक लाख ६० हजार आम्दानी बटुलिसकेका छन् । 

‘यहाँ उत्पादित खुर्सानी बिक्रीका लागि बजारको समस्या छैन,’ उनले भने, ‘स्थानीय र पोखराका बजारमा खुर्सानी बिक्री हुँदै आएको छ ।’

चार वर्ष मलेसियमा काम गरेर फर्किएका उनले अन्ततः आफ्नै गाउँमा खुर्सानी खेती गरी सन्तोष जनक आम्दानी गरेका छन् । 

बाँझो जमिनको सही सदुपयोग गर्न सकेको खण्डमा आम्दानी गर्न सकिन्छ भन्ने उदाहरणको सार्कीले दिएका छन्।