वासिङ्टन- अमेरिकी राष्ट्रपति डोनाल्ड ट्रम्पले इरानले डिसेम्बर २०२४ देखि देश छोड्न नदिएकी अमेरिकी नागरिक डेना करारीलाई रिहा गरेको जानकारी दिएका छन्। उनका अनुसार करारी सुरक्षित रूपमा इरानबाट बाहिरिएर अमेरिका फर्किसकेकी छन् र उनको स्वास्थ्य अवस्था सामान्य रहेको छ।

राष्ट्रपति ट्रम्पले आफ्नो ‘ट्रुथ सोसल’ सामाजिक सञ्जालमार्फत इरानको कदमप्रति आभार व्यक्त गर्दै यसलाई सद्भावनाको सङ्केतका रूपमा लिएको बताएका छन्। प्रारम्भिक प्रतिक्रियामा उनले करारीको नाम सार्वजनिक नगरी ‘गलत रूपमा हिरासतमा राखिएकी अमेरिकी नागरिक’ मात्र उल्लेख गरेका थिए ।

पछि करारीका वकिल जारेड जेन्सरले रिहा भएकी व्यक्ति आफ्नी मुवक्किल डेना करारी भएको पुष्टि गरे। उनका अनुसार अमेरिकी–इरानी नागरिक करारीलाई शत्रु राष्ट्रसँग सहकार्य तथा जासुसी गरेको आरोपमा इरानमा रोकिएको थियो।

जेन्सरले करारीले सञ्चालन गर्दै आएको ‘चिल्ड्रेन अफ मेहर फाउन्डेसन’ नामक गैरनाफामूलक संस्थामार्फत निजी सहयोगबाट इरानका विपन्न बालबालिकालाई सहायता उपलब्ध गराउँदै आएको र यही गतिविधिका कारण उनी इरानी अधिकारीहरूको निगरानीमा परेको दाबी गरे।

उनका अनुसार करारीलाई औपचारिक रूपमा जेलमा नराखिए पनि देश छोड्न प्रतिबन्ध लगाइएको थियो। साथै, इरानको गुप्तचर तथा सुरक्षा निकायले उनीसँग पटक–पटक सोधपुछ गरेको र त्यसक्रममा शारीरिक तथा मानसिक तनावसमेत भोग्नुपरेको बताइएको छ।

वकिल जेन्सरले इरानसँग अझै हिरासतमा रहेका अन्य अमेरिकी नागरिक तथा राजनीतिक बन्दीलाई पनि रिहा गर्न आग्रह गर्नुभएको छ। पश्चिमी मुलुकहरूले इरानले विदेशी नागरिकलाई कूटनीतिक दबाब सिर्जना गर्ने माध्यमका रूपमा प्रयोग गर्ने आरोप लगाउँदै आएका छन्।

यसअघि गत मे महिनामा अमेरिकाले पनि इरानमा १० वर्ष जेल सजाय भोगिरहेका अमेरिकी स्थायी बसोबासको हैसियत भएका एक इरानी नागरिक रिहा भएको घोषणा गरेको थियो।

गत महिना अमेरिका र इरानबीच मध्यपूर्वमा जारी युद्ध अन्त्य गर्ने उद्देश्यले समझदारीपत्रमा हस्ताक्षर भए पनि त्यसयता दुवै देशबीच पुनः सैन्य तनाव बढ्दै गएको छ।