काठमाडौं– राष्ट्रिय स्वतन्त्र पार्टीकी सांसद सृष्टि भट्टराईले सामाजिक सञ्जालमा आफ्नो भिडियो भाइरल भएपछि स्पष्टीकरण दिएकी छन् ।

 उनले उक्त भिडियो हालको नभई धेरै अघि निजी यात्राका क्रममा खिचिएको बताउँदै आफू चालक नभई यात्रुको रूपमा रहेको स्पष्ट पारेकी हुन् ।

उनले आफ्नो समाजिक सञ्जालमा लेखेकी छन्,’ उक्त भिडियोमा म सवारी साधनको चालक नभई यात्रुको रूपमा यात्रा गरिरहेको अवस्थामा देखिन्छु, जहाँ केही क्षणका लागि कारको झ्यालबाट बाहिर हेर्दै तथा रमाइलो गरिरहेको दृश्य देखाइएको छ।

सबैभन्दा पहिले, उक्त भिडियो हालको नभई धेरै अघि व्यक्तिगत रूपमा यात्रा गरिरहेका बेला खिचिएको पुरानो भिडियो हो । सो भिडियो मेरो हालको सार्वजनिक जिम्मेवारी वा सरकारी नियुक्तिपूर्वक निजी समयसँग सम्बन्धित रहेको कुरा स्पष्ट गर्न चाहन्छु ।’

उनका अनुसार भिडियो कुनै सरकारी कार्यक्रम वा सार्वजनिक जिम्मेवारीसँग सम्बन्धित नभई निजी जीवनको सामान्य क्षण मात्र हो । सार्वजनिक पदमा रहे पनि व्यक्तिको निजी जीवनको अधिकार रहने भन्दै उनले गलत व्याख्या नगर्न आग्रह गरेकी छन् ।

साथै, भिडियोमा देखिएको गतिविधिलाई ट्राफिक नियमको सन्दर्भमा आलोचना भए पनि त्यसलाई सचेतनाको रूपमा लिनुपर्ने उनको भनाइ छ । उनले भविष्यमा यस्ता गतिविधि दोहोर्‍याउने नगर्ने प्रतिबद्धता जनाउँदै ट्राफिक नियमको पालना गर्न सबैलाई आग्रह गरेकी छन् ।