काठमाडौं- बूढानीलकण्ठ नगरपालिका–५ स्थित अन्तर्राष्ट्रिय कृष्णभावनामृत संघ (इस्कोन) मा हुने बालयौन दुर्व्यवहारका घटना सार्वजनिक भएको छ । आफूमाथि दुर्व्यवहार भएको भन्दै बालबालिकाले उजुरी दिएपछि इस्कोनका सञ्चालक सुरजकृष्ण श्रेष्ठ पक्राउ परेका छन् । जिल्ला प्रहरी परिसर काठमाडौंका एसपी पवन भट्टराईका अनुसार केही दिनअघि पक्राउ गरेर श्रेष्ठमाथि बालबालिका सम्बन्धी कसुरमा अनुसन्धान सुरु गरिएको छ ।

विश्वव्यापी सञ्जाल भइ नेपालमा पनि सञ्चालन भइरहेको इस्कोनलाई केही पात्रहरुले शैक्षिक केन्द्रको आडमा यौन प्यास मेट्ने अखडा बनाएको तथ्य केही दिनअघि बाहिरिएको थियो । योहो टेलिभिजामार्फत पीडितले आफूहरुमाथि भएको अत्याचारको भण्डारफोर गरेका थिए । उनीहरुले गुरुकुलमा अन्य बालबालिकामाथि पनि यौन हिंसा तथा दुर्व्यवहारका घटना हुने गरेको जनाएका छन् । अभिभावकले पनि गुरुकुलमा यौन हिंसा भइरहेको खुलासा गरेका छन् ।

घटना के थियो ?

दाङका एक दम्पत्तिका एक छोरा र एक छोरी इस्कोनमा अध्ययन गर्दै आएका थिए । इस्कोनकै क्यान्टिनमा आमाले काम गर्थिन् भने बुवा त्यहीँ चालकको काम गर्थे । सोही क्रममा उनीहरुलाई इस्कोनका गुरु बद्रीदास भन्ने युक्रेनी मूलका भारतीय नागरिक इगोर ओभ्लोनोकोभले सन्तानलाई गुरुकुलमै राख्न सल्लाह दिए । उनले भने, ‘छोरीलाई गुरुकुल राख । उसको भविष्य राम्रो हुन्छ । भोलि ठूलो मान्छे बन्छे । बाँकी म हेर्छु ।’

त्यसै अनुरुप २०७८ जेठमा छोरीलाई गुरुकुल राखियो । उनी बिहान साढे चारदेखि बेलुका ७ बजेसम्म गुरुकुलमै अध्ययन गर्थिन् । सुरुमा राम्रै थियो, तर ३ महिनापछि गुरुकुलकै सिनियर १९ वर्षीय ईश्वर श्रेष्ठले उनीमाथि यौन हिंसा गर्न थाले । एक्लै भेट्दा च्याप्ने, गोप्य अंग समाउन लगाउने गर्थे । उनले भान्साकोठामा बालिकामाथि यौन सम्बन्ध बनाउने प्रयास गरे । भान्सा कोठाको प्रयास असफल भएपछि त्यसको पाँच दिनपछि गुरुकुलकै भोग चढाउने मन्दिरमा पनि एक्लै भेटेर जर्बजस्ती गर्ने प्रयास गरे ।

पीडित नाबालिकाले भनेकी छिन्, ‘ईश्वर श्रेष्ठले आफ्नो हात मेरो गोप्य अंगमा राख्ने र मेरो हात आफ्नोमा राख्न लगाउँथे । कपडा उठाउन छतमा जाँदा त्यहाँ पनि दुर्व्यवहार गर्थे । भेटी चढाउने मन्दिरमा पनि मलाई समाउँथे । उसले ममाथि पटकपटक दुर्व्यवहार गरे । तर, सुरुमा मलाई यो के गरेको हो थाहै भएन ।’ बालिकाकी आमाले धर्मको नाममा व्यभिचारीहरु मौलाइरहेको आरोप लगाएकी छिन् । उनले भनेकी छिन्, ‘कृष्णभक्ति सिक्न गएकी ८ वर्षीया छोरीमाथि कुकर्म गरेका छन् । सात वर्षको बच्चालाई गुरुकुलमा राखेर १० वर्षपछि निकाल्दा त्यहाँ यौन सम्बन्ध भइसक्छ भने अभिभावक चुप लागेर बस्न सक्छ ?’

उनीमाथि १० वर्षको उमेरदेखि नै यौन दुर्व्यवहार हुने गरेको खुलेको छ । उनलाई ८ वर्षको उमेरमा आमाबुवाले कृष्णभक्ति र संस्कार सिकाउन इस्कोन पठाएका थिए । आफ्नी छोरीमाथि भइरहेको छ भन्ने उनीहरुलाई थाहै थिएन । पछि आमाबाबुले २०८० माघमा इस्कोनकै पाल्पा जिल्ला शाखामा छोरी पठाए । तर केही महिनापछि छोरीको स्वास्थ्यमा अचानक समस्या आउन थाल्यो । चिच्याउने, कराउने र रुने गर्न थालिन् । एक्लै कोठा थुनेर बस्थिन् । आफूलाई अपवित्र भए भनेर रुने र कसैसँग नबोल्ने गर्न थालिन् । डराउने र आत्तिएर झस्किने गर्थिन् । आफै विक्षिप्त अवस्थामा हुँदा पनि उनले कसैलाई केही भन्न सकिनन् ।

समस्या बढ्दै गएपछि अभिभावकले खोजीनिति गर्न थाले । छोरीबाट केही थाहा नपाएपछि उनैलाई पढाउने शिक्षिकालाई बुझ्न लगाएपछि बालिकाले आफूमाथि भएको घटना खुलाइन् । ईश्वरले आफूलाई अपवित्र बनाएको बताइन् । यति मात्रै होइन, इस्कोनमा ५ वर्षीय छोरामाथि पनि दुर्व्यवहार हुने गरेको खुल्यो । पीडित बालकले सुन्दरगोपाल प्रभु नाम गरेका सुरजकृष्ण श्रेष्ठले कुखुरा बनाउने, शरिरमा पिन गोप्ने, हान्ने गोरुमाथि बसाउने लगायतका कठोर सजाय दिने गरेको बताएका छन् ।

गुरुकुलको कुरा घरमा भने अझै दोब्बर सजाय दिने भनेर धम्क्याउँथे । बालकको शरीरभर पिनले घाचेका घाउ नै घाउ छन् । धर्म र आस्थाको नाममा इस्कोनमा अत्यासलाग्दो अपराध भइरहेको अभिभावक बताउँछन् । छोरीमाथि यौन दुर्व्यवहार र ५ वर्षको छोरामाथि शारीरिक यातनाले अभिभावक आक्रोशित र विक्षिप्त छन् ।

अपराधी जोगाउन सक्रिय

अपराधलाई जोगाउन केही व्यक्ति सक्रिय रुपमा लागेको अभिभावक बताउँछन् । छोराछोरीमाथि भएको क्रुर र अमानवीय व्यवहारका बारेमा बुझ्न उनीहरु इस्कोन सचिव रुपेश जोशीलाई भेट्न पुगे । त्यहाँ दुर्व्यवहार हुँदै आएको पनि जानकारी दिए । उनले यसबारे थप बुझ्न एक महिनाको समय मागे । पछि सुरजकृष्ण रुपेशकै सालो भएकाले परिवारभित्रको कुरा बाहिर निकाल्नु हुँदैन भनेर गोप्य राख्नुपर्ने दबाब दिन थालियो ।

उनीहरुले सबै प्रभुको चाहना हो । तिम्रो कर्म हो । तिमीले भोग्नैपर्छ जस्ता गैरजिम्मेवार अभिव्यक्ति दिएको परिवारको भनाइ छ । कतैबाट समाधान नभएपछि अभिभावकले इस्कोनकै चाइल्ड प्रोटेक्सन अफिस सीपीयो खबर गरे । भारतबाट प्रतिनिधिहरु तीन पटकसम्म नेपाल आएर सोधपुछ, अनुसन्धान र बयान लिएका थिए । सबै कर्तुत बाहिरिने भएपछि सुरजकृष्ण र उनकी पत्नी देवयानीसहितको ३०/३५ जनाको टिमले भारतीय टोलीमाथि नै आक्रमण गरे । संकलन गरेका प्रमाण खोसे । फोनहरु खोसे र ल्यापटप फ्याकिदिए ।

उल्टै गल्ती स्वीकार गर्न लगाए । उनीहरुसँग हतियार पनि भएकाले सीपीयो टोली डरायो । भारतीय टिमलाई डर देखाएर पठाए । इस्कोन नेपालका अध्यक्ष प्रदी भण्डारीले घटनाबारे बुझ्ने क्रम जारी रहेको बताएका छन् । दोषीलाई कानुनसम्मत कारवाही हुनुपर्ने भन्दै उनले सीपीएको रिपोर्ट नआएको जानकारी दिएका छन् ।

बालबालिकालाई अहिले मनोपरामर्शमा राखिएको छ । २२ जना गुरुकुलमा अध्ययनरत रहेकामध्ये हाल ५ जना मात्रै बाँकी छन् । यहाँ शिक्षक र विद्यार्थीबीच पनि अनैतिक सम्बन्ध र नेतृत्वमा रहेकाहरुको बहुसम्बन्ध सतहमा आएको छ । हाल सुरजकृष्ण श्रेष्ठ पक्राउ परेका छन् भने ईश्वर श्रेष्ठ फरार रहेका छन् । यस घटनाले समग्र अध्यामिक क्षेत्रको नाम बदनाम गरेको छ ।