काठमाडौँ – कीर्तिपुरको राधास्वामीस्थित सुकुमवासी होल्डिङ सेन्टरमा तीन तीनदेखि खाना बन्द भएको छ । आइतबार साँझदेखि खाना बन्द भएको भन्दै त्यहाँ बसेका सुकुमवासीले सोमबार बिहान आन्दोलन नै गरे । सोमबार चिउरा खाएर तीन कटाएका विस्थापितले मंगलबार बिहानसमेत खाना नपाएको गुनासो गरेका छन् ।

होल्डिङ सेन्टरबाट खबरहबमा फोन गर्दै उनीहरुले गुनासो गरेका हुन् । ‘अस्तिको दिन साँझ ६ बजेदेखि खाना बन्द भएको आज बिहानसम्म पनि आएको छैन’, होल्डिङ सेन्टरका एक आश्रृतले फोनमा भनिन् ।

सरकारलाई जवाफदेही बनाउन स्थानीयको सहयोग नमागेको उनीहरुको भनाइ छ । सोमबार बालबालिकालाई चिउरा र दही दिएको थियो भने ठुलालाई चिउरा र दालमोट दिएको थियो ।

सरकारले उपत्यकाका नदी किनारका सुकुमवासी बस्ती भत्काइदिएपछि स्थायी बसोवासको आशमा झण्डै दुई महिनादेखि ६५ परिवारका २ सय ७७ जना आश्रित यही आश्रमको ट्रसमा अस्थायी टेन्ट टाँगेर बसिरहेका छन् । मिठो नमिठो जेजस्तो भएपनि बिहान बेलुका खाना खान पाइरहेका थिए । आइतबार साँझपछि होल्डिङ सेन्टरमा न त चुह्लो बल्यो, न त कसैले खानाको पोको नै बोकेर ल्याइदियो ।

‘हामी भोकै बस्यौँ, बालबच्चालाई दहीचिउरा खुवायौँ’

कहिले राधास्वामी सत्संगको प्याकिङ खाना त कहिले काठमाडौँ महानगरपालिकाले मेस सञ्चालन गरेर दिने गरेको खानाको भरमा दिन काटिरहेका यी आश्रितले सोमबार दिनभर खाना पाएनन् । खानै नपाएपछि बिहान विद्यालय जाने तयारीमा रहेका बालबालिकाको पढाइ छुट्यो । बिरामीले औषधि खानेबेलासम्म पनि खाना खान नपाएपछि अन्ततः उनीहरू आन्दोलनमा उत्रिन बाध्य भए । मंगलबार पनि हिजोको जस्तै स्थिति रहेको उनीहरुको भनाइ छ ।

यता, काठमाडौँ महानगरपालिकाले भने यसलाई ‘सिस्टम चेन्ज’ हुँदाको सामान्य ढिलाइ मात्र भएको दाबी गरेको छ । महानगरका प्रवक्ता नवीन मानन्धरले हिजोसम्म बिहान, दिउँसो र बेलुका नियमित खाना खुवाइरहेको दाबी गरे । ५–६ घण्टाको व्यवस्थापनमा केही समस्या आएको उनको दाबी छ ।

महानगरले उनीहरू त्यहाँ बसुञ्जेल रेखदेख गर्ने जिम्मा आफ्नै भएको र स्थायी बसोबास नभएसम्म हेर्ने बताएको छ । यद्यपि त्यसपछिको सम्पूर्ण जिम्मा केन्द्र सरकारको हुने महानगरको भनाइ छ ।

राधास्वामी भन्छ– हामीलाई थाहै छैन

राधास्वामी सत्संगले खानाको जिम्मा लिएको महानगरले दाबी गरिरहँदा सत्संग आश्रमको जवाफ भने बिल्कुल फरक छ ।

आश्रमका एक कर्मचारीले भने, ‘महानगरले खाना खुवाउन सुरु गर्नुभन्दा पहिले सुरुका केही दिन हामीले आफ्नै तर्फबाट खाना खुवाएका हौँ । तर, जब महानगरले यो सबै जिम्मेवारी आफ्नो हातमा लियो, त्यसपछि हामीले केही पनि गरेका छैनौँ । आजको विषयमा हामीलाई कुनै जानकारी नै छैन ।’