काठमाडौं– काठमाडौं महानगरपालिकाले सडक आश्रित सहयोगापेक्षी मानवमुक्त सहर बनाउने अभियान अन्तर्गत उद्धार कार्य सुरु गरेको छ। पशुपति, कालीमाटी र टेकु क्षेत्रबाट पहिलो दिन ९ जनाको उद्धार गरिएको हो।

महानगरका कार्यवाहक प्रमुख सुनिता डंगोलसहित महानगर प्रहरी, नेपाल प्रहरी र मानव सेवा आश्रमको टोली फिल्डमा खटिएको छ। उद्धार कार्य हरेक दिन तीन सिफ्टमा सञ्चालन हुने महानगरले जनाएको छ।

महानगरले बेसहारा, अशक्त र बिरामी व्यक्तिहरूलाई प्राथमिकतामा राखी उद्धार, उपचार र पुनःस्थापना गर्ने तथा शारीरिक रूपमा सक्षम व्यक्तिलाई माग्ने पेशा नियन्त्रण गरिने जनाएको छ।

पहिलो दिन महानगरपालिकाका कार्यवाहक प्रमुख डंगोल, गायिका आनी छोइङ् डोल्मा, मानव सेवा आश्रमका अध्यक्ष रामजी अधिकारी, महानगर प्रहरी, नेपाल प्रहरीसहितको टोली रात्रिकालीन सडक सेवाका लागि पशुपति क्षेत्र पुगेको थियो । 

पशुपति क्षेत्रबाट नुवाकोट घर भएका ६५ वर्षीय पुरुष, रामेछाप घर भएका ५० वर्षीय, ४८ वर्षीय र ४१ वर्षीय गरी ३ जना पुरुष र काभ्रे घर भएका ४८ वर्षीय १ जना र ५० वर्षीय एक जना व्यक्ति गरी ६ जनालाई उद्धार गरियो । उनीहरूमध्येका ३ जना सामान्य अवस्थाको छन्। एक जनाले पाइपबाट पिसाब निकाल्न युरिन क्याथेटर लगाएका छन् । एकजनाको बायाँ खुट्टा काटिएको छ । एक जनाले क्षयरोगको औषधि सेवन गरिरहेका छन् । 

पशुपति क्षेत्रपछि सेवाका लागि खटिएको टोली कालीमाटी पुगेको थियो । कालीमाटीबाट काभ्रे घर भएका ८६ वर्षीय एक जना पुरुष र काभ्रे घर भएका ५० वर्षीय एक जना पुरुषको उद्धार भयो । उनीहरु दुवैको अवस्था सामान्य छ । 

आज टेकु क्षेत्रबाट धादिङ घर बताउने करिब ६० वर्षीय एक जना ज्येष्ठ नागरिकको उद्धार भएको छ ।