काठमाडौं– प्रतिनिधि सभामा प्रतिनिधित्व गर्ने विपक्षी दलले संसदीय अभ्यासअनुसार सासद्लाई अघि बढाउनुपर्नेमा जोड दिएका छन् ।  

बिहीबार सिंहदरबारमा बसेको नेपाली काँग्रेस, एमाले र नेकपाको संयुक्त बैठकपछि सभामुख डोल प्रसाद अर्यालसंग छलफल गर्दै विपक्षी दलका सांसदहरूले संसदीय अभ्यासअनुसार संसद् चल्नुपर्ने र सार्वजनिक लेखा समिति प्रमुख प्रतिपक्षी दलले पाउनु पर्ने परम्परालाई स्थापित गर्न आग्रह गरेका हुन् ।

छलफलपछि नेकपा संसदीय दलका प्रमुख सचेतक युवराज दुलालले विगतको परम्परा अनुसार नै संसदीय अभ्यासअनुसार सांसदलाई अघि बढाउन आग्रह गरिएको बताए । उनले परामर्श समितिमा विगतमा सबै दलहरूसँग परामर्श गरेर कार्य प्रक्रिया बढाउने अभ्यासलाई पनि निरन्तरता दिन आग्रह गरिएको उल्लेख गरे । 

छलफलका क्रममा सभामुख अर्यालले आगामी बैठकहरूमा दलहरूसँग पर्याप्त छलफल गरेर समन्यात्मक ढंगले अघि बढ्ने प्रतिबद्धता जनाएको दुलालले बताए । 

उनले सार्वजनिक लेखा समितिको सभापतिमा नेकपाले कांग्रेसलाई सघाउने जानकारी दिए । छलफलमा कांग्रेसका तर्फबाट अर्जुननरसिंह केसी, भरत खड्का, भीष्मराज आङ्दाम्बे र योगेश गौचन एमालेबाट गुरु बराल र पदमा अर्याल तथा नेकपाबाट वर्षमान पुन र युवराज दुलाल सहभागी भएका थिए ।