काठमाडौं– गृहमन्त्री सुधन गुरुङले आफ्नो सम्पत्ति विवरणबारे उठेको प्रश्नमा स्पष्टीकरण दिएका छन् । 

संघीय संसद सचिवालय परिसरमा सञ्चारकर्मीहरूसँग कुरा गर्दै उनले सार्वजनिक भएको सम्पत्ति हजुरबुवाको अंशबण्डा नहुँदैको भएको बताए ।

यसका साथै उनले सम्पत्तिको विषयमा अनावश्यक भ्रम नफैलाउन पनि आग्रह गरे। यसअघि चैत २९ गते सार्वजनिक भएको सम्पत्ति विवरणपछि विवाद उत्पन्न भएको थियो । 

सार्वजनिक विवरण अनुसार गृहमन्त्री गुरुङको नाममा धनकुटा, चितवन र गोरखामा जग्गा रहेको उल्लेख थियो । 

प्रधानमन्त्री तथा मन्त्रिपरिषद्को कार्यालयको विवरण अनुसार चितवनको भरतपुरमा १८–३० कट्ठा तथा गोरखाको चुमनुब्री–३ मा २२१ रोपनी जग्गा रहेको उल्लेख थियो ।

त्यस्तै धनकुटाको कार्कीछापमा १९ रोपनी जग्गा रहेको उल्लेख गरिएको छ। विवरण अनुसार गुरुङसँग ८९ तोला सुन, ६ किलो चाँदी तथा करिब ६० लाख रुपैयाँ नगद रहेको छ ।

बैंक खातातर्फ नबिल बैंकमा ५६ लाख २५ हजार ९७६ रुपैयाँ, लक्ष्मी सनराइज बैंकमा ५ लाख ३५ हजार ४०० रुपैयाँ र सानिमा बैंकमा १ हजार ५७४ रुपैयाँ रहेको विवरणमा उल्लेख थियो । 

तर नगद आम्दानीको स्रोत भने खुलाइएको थिएन। सुनलाई भने पैत्रिक सम्पत्ति भएको उल्लेख गरिएको थियो ।