काठमाडौं – वाणिज्य, आपूर्ति तथा उपभोक्ता संरक्षण विभागले ग्यासको कृतिम अभाव सिर्जना गर्ने उद्देश्यले ६ हजार भन्दा धेरै ग्यास भण्डारण गरेको आरोपमा श्रीराम ग्यास उद्योगलाई ३ लाख रुपैयाँ जरिवाना गरेको छ।

विभागका अनुसार सोमबार गरिएको अनुगमनका क्रममा ललितपुर महानगरपालिका–२८ हरिसिद्धि स्थित उद्योगको गोदाममा १४.२ केजीका ६ हजार ३ सय ७७ ग्यास सिलिण्डर भण्डारण गरिएको अवस्थामा भेटिएको थियो। उक्त कार्य ग्यासको कृतिम अभाव सिर्जना गर्ने उद्देश्यले गरिएको ठहर गर्दै उपभोक्ता संरक्षण ऐन, २०७५ को दफा १६ को उपदफा २ खण्ड (छ) विपरीत भएको विभागले जनाएको छ।

सोही ऐनको दफा ३९ को उपदफा (१) खण्ड (ख) बमोजिम उद्योगलाई ३ लाख रुपैयाँ जरिवाना गरिएको विभागले जनाएको छ । साथै गोदाममा मौज्दात रहेको ग्यास सिलिण्डरलाई नेपाल आयल निगमको समन्वयमा बिक्री वितरण गर्ने व्यवस्था मिलाउन निर्देशन दिइएको छ।

विभागले ग्यासको माग उच्च रहेको वर्तमान परिस्थितिमा आपूर्तिमा असर पर्ने गरी कृतिम अभाव सिर्जना नगर्न सबै ग्यास उत्पादक उद्योग र वितरकलाई आग्रह गरेको छ । यस्तै, ७.१ केजी ग्यास वितरणको नीति लागू भएसँगै बजारमा ग्यासको आपूर्ति क्रमशः सहज बन्दै गएको विभागले जनाएको छ।