काठमाडौं- राष्ट्रिय स्वतन्त्र पार्टीका सभापति रवि लामिछाने, महामन्त्री कविन्द्र बुर्लाकोटी र प्रवक्ता मनिष झा लगायत नेताहरू बिरामी परेपछि पार्टीको कार्यतालिका प्रभावित भएको छ ।

कार्यतालिका प्रभावित भएपछि सरकार गठनको प्रक्रिया एक साता धकेलिने भएको हो । पार्टीका नेता मनिष झाले चैतको पहिलो साता नै सरकार गठन प्रकृया सुरु हुने जानकारी यसअगाडि दिएका थिए । तर नेताहरू बिरामी भएका कारण चैत पहिलो साता नै सरकार गठनको प्रक्रिया सुरु हुने अवस्था छैन ।

पार्टी सभापति रवि लामिछानेसहित शीर्ष नेताहरू बिरामी परेपछि संवाद हुन सकेको छैन । रवि सोमबार मात्रै निको भएर अस्पतालबाट डिस्चार्ज भएका छन् । त्यहीकारण जरूरी विधान संशोधन हुन नसकेकाले चैत १० अगाडि सरकार गठन हुने अवस्था छैन ।

महामन्त्री कविन्द्र बुर्लाकोटी पनि अस्वस्थताका कारण घरमै आराम गरिरहेका छन् । सभापति रविलाई अस्पतालबाट केही दिन आराम गर्नु भनेका कारण तत्कालै केन्द्रीय कमिटी बैठक बस्ने अवस्था नरहेको पार्टी प्रवक्ता झा बताउँछन् ।

सभापतिलाई सिजनल ज्वरो इन्फेक्सन तथा खुट्टामा लागेको चोटको गहिरो इन्फेक्सन देखिएको बताइन्छ । पार्टी स्रोतका अनुसार रविलाई एन्टिबायोटिकले काम नगरेका कारण इन्जेक्सनमार्फत उपचार गरिएको छ।

‘सभापतिज्यूले मंगलबार र बुधबार हुने सांसदहरूको प्रशिक्षणको समापन समारोहलाई सम्बोधन गर्ने तालिका छ । उहाँ शिक्षण अस्पतालमा गराइसकेर घरमै केही दिन रेस्ट गर्नुहुन्छ’, पार्टीका एक नेताले, ‘यो साताभित्र सरकार गठन प्रक्रिया अगाडि बढ्ने अवस्था छैन । वरिष्ठ नेता पनि बिरामी भएर भर्खरै निको हुनुभएको छ । अरु छलफल र संवाद हुन पाएको छैन ।’

बालेन्द्र पनि केही दिन अस्वस्थ भएपछि अहिले ठिक हुँदैछन् । उनको सचिवालयका धेरै सदस्य पनि बिरामी परेका कारण घरमै आराम गरिरहेका छन् । बालेन्द्र भने सरकार गठन तयारीको काम गरिरहेका छन् ।

दोस्रो सातामा मात्रै सरकार गठन

निर्वाचन आयोगले आइतबारसम्म समानुपातिकको नाम बुझाउन दलहरूलाई आग्रह गरेको थियो । त्यसअनुसार सबै दलहरूले समानुपातिकको नाम बुझाइसकेका छन् । आयोगले सोमबार ११० जना विजेताको नाम ल्याइसकेको छ।

आयोगले समानुपातिकमा परेका सांसदहरूको नाम सार्वजनिक गरेपछि प्रमाणपत्र वितरण गर्ने कार्यसूची ल्याएको छ । त्यसपछि आयोगले राष्ट्रपति कार्यालयलाई प्रतिवेदन बुझाउँछ र नयाँ सरकार गठनको प्रक्रिया अगाडि बढ्ने अवस्था छ ।

आयोगका एक उच्च अधिकारी चैत दोस्रो सातासम्ममा नयाँ सरकार गठन हुन सक्ने बताउँछन् । ‘आयोगले सम्पूर्ण काम सक्दा दोस्रो साता जान सक्छ । सबै कुरा मिलाउँदा चैत दोस्रो सातापछि देशले नयाँ प्रधानमन्त्री पाउँछ’, आयोगका ती अधिकारीले भने, ‘हामी आफ्नो काम गरिरहेको छौँ । हामीलाई काम सक्न ७ गतेसम्म लाग्ने अवस्था छ ।’

शुक्रबारअघि केन्द्रीय कमिटी बैठक नबस्ने

पार्टी प्रवक्ताका झाका अनुसार यो शुक्रबार अगाडि पार्टीको केन्द्रीय कमिटी बैठक बस्ने अवस्था छैन । बिरामी नेताहरूलाई डाक्टरले केही दिन आराम गर्नु भनेकाले शुक्रबारअगाडि केन्द्रीय कमिटी बैठक बस्ने अवस्था नरहेको नेताहरूको भनाइ छ ।

सभापति लगायत नेताहरूको स्वास्थ्यमा सुधार आएमा शनिबार पार्टीले केन्द्रीय कमिटी बैठक डाक्न सक्ने देखिन्छ ।

‘अहिले यसै भन्न सकिएन । शनिबार पार्टी केन्द्रीय कमिटी बैठक बसाल्नुपर्ने जोड गरिरहेका छौँ । तर नेताहरूको अस्वस्थताले समस्या बनाएको छ,’ पार्टी एक नेता भन्छन्, ‘पार्टीले आन्तरिक तयारी धेरै गर्न पाएको छैन । कसलाई कुन जिम्मेवारीमा पठाउने ? भन्ने पार्टीमा छलफल हुनुपर्छ । तर त्यो गर्ने अवस्थामा अहिले नेताहरू हुनुहुन्न । सबैलाई डाक्टरको सल्लाहअनुसार आराम जरुरी छ ।’

रास्वपाको अवस्था हेर्दा चैतको केन्द्रीय कमिटी बैठक बसेर संसदीय दलको नेता चयनका लागि विधान संशोधन गर्नेछ । पार्टीका वरिष्ठ नेता बालेन्द्र शाहलाई संसदीय दलको नेता बनाउन विधान संशोधन गरेर सरकार गठन प्रक्रिया अगाडि बढ्नेछ ।

‘समानुपातिकका विजेताको नाम आइसकेको छ । आयोगले समानुपातिक उम्मेदवारहरूलाई प्रमाणपत्र दिइसकेपछि आवश्यक प्रक्रिया अगाडि बढ्छ’, झा भन्छन्, ‘आयोगले उहाँहरूको समयअनुसार काम गरिरहनु भएको छ । हामीले गरिरहेका छौं । नेताहरू बिरामी भएपछि थप छलफल गर्न पाइएको छैन ।’

रास्वपाले केन्द्रीय कमिटीको बैठक राखेर विधान संशोधन तयारी गर्नुपर्ने हुन्छ । विधान पारित भएपछि बालेन्द्रलाई प्रधानमन्त्रीका रूपमा अगाडि बढाउने उपसभापति डोलप्रसाद अर्यालले बताएका छन् ।