काठमाडौं- पाकिस्तानका रक्षामन्त्री ख्वाजा आसिफले सामाजिक सञ्जालमा भिडियो सार्वजनिक गर्दै देशमा सङ्गठित रूपमा फैलिरहेको ‘मगन्ते माफिया’ बारे गम्भीर खुलासा गरेका छन् । उनले यस्ता गिरोहका कारण खाडी मुलुकहरूले पाकिस्तानी नागरिकलाई भिसा दिन बन्द गरेको बताएका छन् ।

भिडियोमा एक जना पाकिस्तानी नागरिकले मगन्तेका रुपमा काम गरिरहेका बालकसँग कुरा गरेको देख्न सकिन्छ । ती बालकले भिडियोमा आफ्नो पूरै परिवार नै मगन्ते पेशामा लागेको बताएका छन् ।

रक्षामन्त्री आसिफका अनुसार पाकिस्तानमा पेशेवर रुपमा भिख माग्ने काम मौलाइरहेको छ । उनले सामाजिक सञ्जालमा लेखेका छन्, ‘यहाँ औपचारिक ठेकेदारहरू छन् जसले बालबालिका, महिला र नक्कली अपाङ्गहरूलाई भर्ती गर्छन् र अर्बौँ रुपैयाँ कमाउँछन् । यही माफियाले हजारौँको सङ्ख्यामा मगन्तेहरुलाई खाडी मुलुकमा निर्यात गर्छ ।’

उनले यस धन्दामा विमानस्थलका कर्मचारी, स्थानीय प्रशासन र प्रहरीको समेत मिलेमतो हुने गरेको आरोप लगाएका छन् ।

पाकिस्तानको विदेशमा रहेका नागरिक मामिला मन्त्रालयका अनुसार सन् २०१९ देखि २०२५ सम्ममा ७ हजार ८ सय भन्दा बढी पाकिस्तानीलाई भिख मागेको लगायतका अभियोगमा विभिन्न देशबाट देशनिकाला गरिएको छ । खलीज टाइम्सका अनुसार यसै समस्यालाई मध्यनजर गर्दै पाकिस्तान सरकारले सन् २०२५ देखि देशनिकाला भएकाहरूको राहदानी समेत रद्द गर्न थालेको छ।

भिडियोमा बोल्ने बालकले आफू र तीन दाजुभाइको दैनिक औसत कमाइ १२ हजार पाकिस्तानी रुपैयाँ रहेको जानकारी दिएका छन् । उनका दाजु वास्तवमा अपाङ्ग होइनन् तर, भिख माग्नकै लागि खुट्टा खोच्याएको नाटक गर्छन् ।

भिख मागेकै भरमा उनको परिवारले फैसलाबादको मिल्लत टाउन नामक महँगो क्षेत्रमा घर समेत किनेको छ । भिडियोमा अन्तर्वार्ता लिने व्यक्तिले पवित्र महिना रमजानको अवसरमा सर्वसाधारणलाई जथाभाबी दान नगर्न आग्रह गरेका छन् ।